NAGTINGUHA si American Keith Thurman nga ilugon ang korona sa iyang kababayang si World Boxing Organization (WBO) welterweight champion Terence Crawford alang sa sunod niyang away.
Taodtaod na sab nga nahisgutan ang posibleng panagharong nila ni Thurman ug Crawford apan hangtod karon, wala pa’y klaro ang tanan kon madayon ang ilang panagparang.
Gusto ni Thurman nga mahan-ay na ang ilang panagharong ni Crawford ug nangita na siya’g kontrata nga iyang mapirmahan.
“Where is my contract? How do you want to do business? Write it up. That’s all I have to say,” matod ni Thurman nga napatik sa www.boxingscene.com.
Si Thurman, kinsa kanhi tag-iya sa World Boxing Association (WBA) welterweight title, adunay 30-1, 22KOs nga rekord.
Bugtong nakapilde kaniya mao si Manny Pacquiao.