USA sa nag-unang atraksiyon sa Lungsod sa Asturias, Lalawigan sa Sugbo ang gi-ila nga labing lapad nga linaw sa probinsiya mao ang Buswang Lake.
Ang Buswang Lake nahimutang sa Barangay Bago, Asturias.
Sa wala pa ang pandemiya, dagsa-an naa sa mga lokal nga turista ang maong dapit, ilabi na niadtong mga nature lover.
Giila sab ang Buswang Lake nga usa sa mga nag-unang mauswagon nga destinasyon sa mga turista sa kasadpang bahin sa Probinsiya sa Sugbo.
Sa akong pagduki-duki kon unsay buot ipasabot sa terminong ‘buswang’, gihulagway nga buswak sa tubig nga gikan sa bukid hinungdan naporma ang maong linaw.
Gawas sa kanindot sa talan-awon sa kina-iyahan, adunay mga makalingaw nga kalihokan nga mamahimong masuwayan sa mga manuroy sa maong dapit.
KALINGAWAN
Dili magmika ang mosuroy sa dapit kay gawas nga mabusog ang iyang panan-aw sa mga naglibot nga gasa sa kinaiyahan,adunay mga kalihokan nga gitanyag aron ka malingaw.
Instagramable ang kuha sa hulagway ninyo kon mo-posing sa taas nga kutay sa boardwalk samtang kamo nagbaktas.
Mamahimong mosuway sa pag-explore sa linaw pinaagi sa pagsakay og bangka o kayak, adunay area nga haom sa pagpangaligo, fish feeding o mamasol og isda ug uban pa.
Pahibawo sa publiko nga adunay P10 nga entrance fee nga gipatuman sa community organization nga maoy ilang kuhaan aron sa pagpabilin nga limpyo ang maong lugar.
Di maguol kon bati-on na kamo sa kagutom sa inyong pagsuroy-suroy sa lugar tungod kay anaa ang Buswang Lake House Restobar nga motubag sa inyong panginahanglan.
Sa buot nga magpa-gabii o sunod adlaw nga mopa-uli gikan sa ilang pagpanuroy, adunay establisemento sa area nga mamahimong maka-overnight stay sa tag-P500 matag tawo,libre na ang pamahaw.
Sa mga nagplano og large gatherings o panagtapok aron pagsaulog sa okasyon, adunay cottage nga ka-abangan nga haom sa birthday party, team building, anniversary ug uban pa.
UNSAON PAG-ADTO?
Adunay mga public transportation nga manukad sa Dakbayan sa Sugbo sama sa V-hire nga mobiyahe paingon sa lungsod nga nagparada sa terminal sa Ayala Center Cebu, sa kadtong way pribadong sakyanan.
Gibana-bana nga usa ka oras ug tunga ang biyahe kon manukad sa Cebu City, apan mas paspas ang biyahe kon adunay kaugalingong sakyanan.
Gikan sa National Highway pipila lang ka metros ang Barangay Old Bago.
Daplin pa lang sa dalan mosugat na sa inyong panan-aw ang lapad nga mga kahumayan ug kamanggahan.
Sa mga nagplano nga mosuroy ilabi na karong weekend, ang Buswang Lake bukas alang kaninyo.