1 patay sa bangga

LAING duguong panghitabo sa natonal highway sa lungsod sa Dumanjug, habagatan sa lalawigan sa Sugbo ug ning higayona, usa ka basketball player ang patay sa panagbangga sa Barangay Ilaya niadtong Biyernes sa gabii.

Ang biktima naila nga si Felix Gutana, 29, lumad sa La Libertad, Negros Oriental ug kasamtangan nga nagpuyo karon sa Sitio Dawis, Barangay San Roque dakbayan sa Talisay.

Samtang, dili pa lang dugay, 5 ang patay ug kapin sa napulo ang angol sa aksidente sa Lunes sa Barangay Kanyuko. Ang grupo sakay sa multcab gikan sa Sayaw Beach sa silingang lungsod sa Barili.

Si PO2 Dave John Faunillan sa Dumanjug Police niingon nga pasado alas 11:00 sa gabii niadtong Biyernes dihang paingon na unta pabalik sa Poblacion ang grupo nila ni Gutana gikan sa usa ka duwa sa basketball sa Barangay Tapon, Dumanjug.

Sakay si Gutana sa usa ka multicab (KFR-551) nga gimaneho sa usa ka Carlita Nimel nga taga Dumanjug usab ug naa sa luyo misakay ang biktima.

Dihang naabot ang sakyanan nila sa kurbada nga dalan sa national highway sa Brgy. Ilaya gibanggaan sila sa usa ka Isuzu Truck (ALA-8688) nga gimaneho sa usa ka Joy Balingbing, 27, lumad sa Legaspi, Albay apan kasamtangan nga anaa sa Brgy. Tapon nagpuyo.

Giingon nga nagtaod nig poste sila si Balingbing kinsa konektado sa usa ka contractor sa electric company sa lungsod ug paingon na unta pauli.

Nawagtangan og kontrol si Balingbing ug nabanggaan niini ang multicab diin nalagpot si Gutana.

Nakaangkon ang biktima og samad sa iyang ulo ug naputol ang usa ka tudlo niini.

Gidala pa kini sa Barili District Hospital apan gideklarar nga dead-on-arrival.

Natanggong sa prisohan si Balingbing alang sa kasong ipasaka batok kaniya ug naa sa kustodiya sa kapulisan ang mga sakyanan alang sa dugang imbestigasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph