PINAAGI sa "Isumbong Mo Kay Wilkins" hotline sa Philippine Drug Enforcement Agency (PDEA) sa Davao Region, napuhag ang usa ka drug den sa Pag-asa Street, Sandawa Barangay 76-A, Davao City, alas 4:10 sa hapon, Pebrero 17, 2022.
Sa report sa PDEA-Davao, sikop ang duha ka mga target sa buy-bust operation nga sila Ranulfo Canoy, alyas Radny, 46, gikonsiderang City Priority Target List Number 2; ug usa ka Jeffrey Barnachea, alyas Jeff, 31, delivery driver ug usa ka City Priority Target List Number 8 sa listahan sa awtoridad.
Human nadawat sa PDEA-Davao ang impormasyon, gilayong gikasa ang usa ka buy-bust operation sa hiniusang puwersa sa mga agents sa Regional Special Enforcement Team sa PDEA-Davao uban sa National Bureau of Investigation South Eastern Mindanao Regional Office.
Atol sa operasyon, naaktuhan sa mga pulis nga ang duha ka target dunay duha ka mga parokyano nga nailhang sila Rodel Agopitac ug Julius Jastin Arbolario nga giingong naghithit og gidili nga druga niadtong taknaa.
Mokantidad sa P225,000 nga gituohang shabu, marked money ug mga drug paraphernalia ang nakuha sa posisyon sa mga dinakpan.
Gipangkasohan na kagahapong adlawa ang mga nahisgutan og kasong pagsupak sa Republic Act 9165 kun Comprehensive Dangerous Drugs Act of 2002 didto sa korte.