Aduna na’y lima ka mga kompaniya ang ningpadayag sa ilang interes nga mobalit sa prankisa sa Alaska sa Philippine Basketball Association (PBA).
Tulo niini ang direktang nakigsabot kang commissioner Willie Marcial samtang ang duha nakigsulti kang Alaska team governor Dickie Bachmann.
“May tatlo nang may gusto. May tatlo nang nagtatanong sa prangkisa ng Alaska,” asoy ni Marcial nga napatik sa www.pba.ph. “Tapos may dalawa pang nagtanong din kay Gov. Dickie.”
Niadtong Miyerkules, Pebrero 16, 2022, mismong ang tag-iya sa Alaska nga si Wilfred Uytengsu ang opisyal nga mianunsyo nga mobiya na sila sa liga inig human sa kasamtangang nagpadayon nga Governor’s Cup.
Kapin sa tulo ka mga dekada ug tunga nga nagduwa ang Alaska sa PBA diin nakabira sila og 14 ka mga titulo.
Dihang gibutyag ni Uytengsu nga plano nilang ibaligya ang ilang prankisa, sunodsunod na dayon ang ningpadayag og interes.