Mga duwa karon:
4:00 pm- Alaska
batok Terrafirma
6:45 pm- Magnolia
batok Phoenix
Seguradong puwesto sa quarterfinals maoy tinguha sa league-leader Magnolia Ang Pambansang Manok Hotshots sa ilang pagpakigbatok sa Phoenix Super LPG Fuel Masters sa main game karong alas 6:45 sa gabii sa Philippine Basketball Association (PBA) Governor’s Cup sa Smart Araneta Coliseum.
Ang Hotshots mao na lay bugtong wala pa nakatilaw og pilde sa komperensya ug kasamtangang nag-una sa standing dala ang 5-0 nga rekord.
Bisan wala ang tulo sa ilang mga sinaligan nga sila si Calvin Abueva, Rome dela Rosa ug Mike Harris, ang Hotshots nakamaneho lang gihapon pagbuntog sa NLEX Road Warriors, 112-109, sa miagi nilang duwa niadtong Miyerkules.
Batok sa Fuel Masters, gilauman nga makasugat na sab ang Hotshots og laing malisod nga tahas,
Ang Fuel Masters, nga nagpatong sa ikaupat nga dapit dala ang 4-2 nga rekord, mokombati nga adunay taas nga morale gumikan kay gikan kini sa kutas nga kadaugan batok sa TNT Tropang Giga, 93-92.
Sa premirong duwa, sagubangon sa Alaska Aces ang ikaduha nilang duwa gikan sa ilang pag-anunsyo nga mobiya na sa labing unang professional nga liga sa Asya.
Makigsangka ang Aces sa Terrafirma Dyip sugod karong alas 4:00 sa hapon.
Ang Aces kasamtangang naa sa ikatulong dapit bitbit ang 4-2 nga rekord samtang ang Dyip nagsakay sa ika-10 nga puwesto dala ang 2-4 nga baraha.