Binghay: Dunggab sa buko-buko ug libak tudo-tudo

Sa makadaghang higayon sa akong pagtudlo sa subject nga Human Relations, akong gibalik-balik pagpahimangno sa akong mga tinun-an kining mosunod nga mga lagda aron mas tunhay ang pakig-relasyon ngadto sa uban, ma higala, kauban sa buhat o kapamilya.

Ayaw ihikaw ang paghatag og pagdayeg labi na kon kini siya takus ug angay nga makadawat ini. Dunay uban nga dali kaayong makalitok og pagdayeg apan maka-ingon ko nga di sinsiro kay inig talikod sa ka-estorya, maputos man kini sa saway, dunggab sa buko-buko ug libak tudo-tudo.

Likayi ang pagpanaway unya disiplinaha ang kaugalingon pagtak-om sa baba kon way nindot nga ma estorya o sulti sa uban kay wa ta kahibalo sa tinuod nga sitwasyon o gidangatan anang imong gisaway. Posibling dunay gipas-an nga dakong problema, way kapuy-an, nawad-an og trabaho, may nasakit sa pamilya o namatyan nga minahal.

Wa sab tay katungod nga manghusga sa uban. Panamini una ang kaugalingon una mobuhi og maha-it o law-ay nga pulong.

Ayaw pili-a kon kinsa ang imong hatagan og pagtahod bisag unsa pa nga grado ang naabot o posisyon nga gigunitan, ma manager o janitor.

Mas maayong mogamit, sampit o tawag sa pangalan o angga sa imong kaila kay ang makadungog ini bation man og kalipay nga ikaw naka-ila o nakahinumdom nila.

Respituhi ang opinion, rason, huna-huna ug punto sa uban bisag unsa pa kini kasukwahi sa imong naandan ug pagtuo.

Ayaw pagmakuli pangumusta ug pagtimbaya sa imong mabagtan nga kaila o higala.

Ang pagka-mahigalaon usa ka hiyas nga daghang mag-apas. Bahala og kabus basta dato sa kasingkasing ug mga higala.

Tabang o boluntaryo sa pag-abag sa mga nanginahanglan ug nagkalisod kay diha nimo matino ang tinu-oray nga higala sa kalipay ug kalisod. Sahi pa ikaw na sab unya’y nanginahanglan sa ilang tabang. Hinumdumi, ‘no man is an island’ baya.

Katapusan, ayaw ihikaw imong maanindot nga pahiyom. Wa ta kahibalo basin diay dunay nagpahipi nga nadani sa imong tam-is nga smile.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph