Lalakeng nagmotorsiklo nabalian sa iyang tiil human nalatayan sa gikasugat nga sakyanan alas 5:20 sa hapon sa Huwebes, Pebrero 17, sa Brgy. Road, Anonang Sur, dakbayan sa Bogo.
Ang biktima nga nadala sa tambalanan giilang si Roldan Gesta Hortelano, taga Brgy. Tambongon sa lungsod sa San Remegio, amihanang Sugbo samtang ang driver sa Ford Ranger Raptor giilang si Adrian Trogo Mendoza, hingkod, taga Riverside, Canduman, dakbayan sa Mandaue.
Si Police Lt. Col. Florendo Fajardo, hepe sa Bogo City Police Station, nagkanayon nga si Hortelano sakay sa iyang Honda XRM.
Pag-abot sa nahisgutang lugar, iyang gikasugat ang Ford Ranger nga gimaneho ni Mendoza.
Si Mendoza ni-overtake sa laing sakyanan sa likuon nga karsada.
Si Hortelano nga nakakita sa gikasugat nga sakyanan ni-brake sa iyang motorsiklo, apan na slide siya sa karsada ug nalatayan sa sakyanan.
Matod ni Fajardo nga gidala sa tambalanan ang biktima samtang si Mendoza gibuhian human gikasabot ang pamilya ni Hortelano nga abagahon ang tanang galastuhan.