Tungod sa social media karon, sayon ra kaayo ang connection sa mga mahiligon sa biseklita sama nako. Sa social media usab mahipos og tarong ang mga handumanan nga maanindot sa pagsikad pinaagi sa hulagway. Kana kon di manira ang Facebook sama sa nahitabo sa Friendster kaniadto. Naratsada gud ang ubang maanindot nga photos.
Pinaagi usab sa social media, sayon ra ang pagpangita og mga grupo nga imong makuyogan sa pagsikad. Di sama kaniadto nga lisod, kay bisan gani sa imong mga silingan, wa ka makahibawo kon sama sab diay nimo, mahiligon og tindak.
Makalingaw na sab ron ang mga video nga ipang-upload, labina sa mga mahiligon og trail. Di ko hilig og trail kay ang akoa exercise man, pagpanghabwa sa fats ug toxins sa lawas. Apan taudtaud na kong wa na makasikad.
Sa social media ra sab ko nasayod nga duna diay maanindot nga mga trail, apan kuyaw lang. Kon talan-awon ang sukdanan sa kaanindot sa lugar, naay daghan sa trail. Nakakuyog na man ko og short trail ride nga nagtuyok tuyok lang sa usa ka lugar nga naa boundary sa Cebu City, Mandaue City ug Consolacion. Duol ra alang sa taudtaud nang nagbiseklita.
Makalingaw ang trail, apan di maayo alang sa mga taslakan og dulhog sama nako. Kana ra bang naa sa mga video, sayon o di kaayo titip tan-awon, apan sa actual, makapanguros ka, labina kon bag-o ka pa. Kulba kaayo, labina kon mag-agi mo sa kabatoan, daghan og pebbles ang agianan o grabe ka dulhugon.
AYAW OG DIRETSO
Kon trail riding, nagkinanglan kini sa pag-anad sa kaugalingon kon bag-o ka pa. Mas maayo gani nga mokuyog sa mga nakahibawo na ug imong mga higala kay aron ka matudloan sa pag-maneuver sa bike.
Nahinumdom ko sa usa nako ka kauban sa biking community nga nagsugod sa cross country (XC) until ni-shift siya sa trail riding. Sama nako, nagpanagana siya hangtod nga nisuway. Hinayhinay siyang nakat-on hangtod nga ni-focus siya sa trail.
Sa iyang video posts ug pictures, dunay mga time natumba, nabalitok siya. Apan wa siya moundang kay nalingaw man siya. Part of learning sab ang ingon niana. Basta di lang sab life threatening. Nagkadugay, nagkahaniti na siya sa trail ug downhill. Full suspension na ang iyang biseklita, gikan sa XC.
Sa ako nang giingon, ayaw og diretso. Anam-anam ug pagpatudlo unsaon.
HAUM
Mas maayo ang full suspension nga pang cross country kay sa hard tail ang frame. Mas di ka panguyawan sa imong pagsikad kay sa mag hard tail. Mao ni ang assessment sa akong mga higala nga ni-shift og suspension gikan sa hard tail frame.
Tungod sa maayo nga bounce, mas maayo ang imong balanse gikan sa grabeng vibration nga ma-create sa mga hump sa imong agianan. Nahinumdom ko sa akong usa ka higala nga nibalhin sa full suspension, nagngisi nang nagdulhog kay matod niya, “wa nay kulba.”