Ampaw. Mao kini ang komentaryo ni Rudy ‘Kid’ Cañeda kabahin sa dakong lead ni kanhi senador Ferdinand ‘Bongbong’ Marcos Jr. sa mga survey sa Pulse Asia ug Social Weather Station (SWS).
Gihulagway nga ampaw ang maong lead kay dali kining magupok kon kumoton. Sama kini ni sa ampaw, kining kinaham nga produkto sa Syudad sa Carcar.
Sa akong pangagpas man gud, daghan kaayo ang mga tigpaluyo ni Bise Presidente Leni Robredo nga nagpahipi lang. Anam-anam kini silang manggawas inig duol na sa eleksyon.
Pareho kini sa nahitabo kaniadtong 2016. Nanggawas ang mga nagsuporta kang Robredo dihang naalarma ang mga tarong nga botante nga leading si Marcos Jr. sa mga survey. Nibotar sila kang Robredo kay nakita nga siya lang ang makapildi sa anak sa diktador.
Sa laing bahin, makita nato nga gamay lang ang tininuod nga tigsuporta ni Marcos Jr. Mas magdali sila sa mga ipanghatag.
Tungod niini, nagtuo ko nga sakto kining obserbasyon ni Cañeda.
Bisita sa 24
Atong personal nga makita ang kadak-on sa suporta ni Robredo dinhi sa Sugbo karong Pebrero 24, ang adlaw nga gitakdang mobisita siya sa Sugbo.
Alang kanako, mao na kini ang kasaulogan sa Edsa 1 dinhi sa atua. Ug nagtuo ko nga mahimong pink ang color sa Syudad sa Sugbo.
Unang moadto si Leni sa Syudad sa Talisay. Nasiguro ko nga ma-busy gyud ang mga inisyal nga sakop sa mga na-rekrut sa Balik LP kay daghan kanila ang naa sa Talisay magpuyo sala nilang Dory Emit, Noel Tabasa, ug Girlie Baya.
Nakahinumdom mo sa mga mangingisda nga nag-fluvial parade nga pink? Naa kini sila magpuyo sa Tangke, Talisay.
Heaven-sent
Inig human sa Talisay, moadto si Leni sa lungsod sa Argao, ang hometown ni retired Chief Justice Hilario Davide Jr. ug sa iyang anak nga si Vice Governor ‘Junjun’ Davide III.
Sa miaging mga adlaw, si Chief Justice nagmensahe pinaagi sa video nga si Leni “heaven-sent” kun gipadala sa kalangitan aron makatabang kanato nga nakigbisog alang sa demokrasya ug hustisya.
Si Junjun Davide, sa iyang bahin, mao ang labing dako nga opisyal sa lalawigan nga lider ni Leni. Siya sab magpasubli isip bise gobernador isip running mate ni kanhi tourism secretary Ace Durano nga nidagan alang sa pagka gobernador.
Si Ace Durano ug Junjun Davide mao ang paglaum nga makab-ot ang mas malambuon nga Sugbo.
Basi sa mensahe ni Chief Justice, makaingon kita nga kining maong pakigbisog ni Leni, Ace, ug Junjun usa ka pakigbisog sa mga maayo batok sa dautan. Pakigbisog kini aron modaog ang kahayag batok sa kangitngit.
Rali sa SWU
Madugang nato nga gawas sa mga Davide, naay lider sa Argao ug sa second district nga naa nagsuporta kang Leni karon.
Matod pa sa usa nato ka higala nga mayor, nadani kining maong lider tungod kay dapig kang Leni ang iyang mga anak.
Inig human sa Argao, modagan na sab si Leni sa Toledo aron makighimamat labi na sa mga mamumuo sa Carmen Copper.
Inig ka hapon na, moanha sa SWU grounds si Leni alang sa labing dakong rali nga makita ang mga Sugboanon. Akong pangagpas nga mas dako pa gani kini sa higanteng rali sa mga Pink didto sa Quezon City. Gipaabot ang tanang mga tigsuporta ni Leni sa SWU inig ka hapon. (DM nako sa @anol_cebu)