Ang Cebu City Development Council (CCDC) niduso og P400 milyunes nga gahin alang sa P5,000 nga assistance sa mga biktima sa bagyo.
Ang P400 milyunes tipik sa giaprobahan sa CCDC nga supplementary Annual Investment Program (AIP), nga sa kinatibuk-an niabot og P1.6 bilyune,s atol sa gipahigayong tigom niadtong Biyernes, Pebrero 18, 2022 sa usa ka hotel.
Ang P400 milyunes maoy kuhaan sa tag P5,000 nga cash assistance sa mga pamilyang hingpit nga nagub-an sa ilang mga balay atol sa bagyo, matod sa Cebu City News and Information, news platform sa Kagamhanan sa Dakbayan sa Sugbo.
“That’s the money of the people. We have to give it to those who are qualified,” matod ni Rama kalabot sa dugang gahin.
Iyang gihangyo ang barangay officials sa pagtabang sa pagsusi sa mga benepisaryo.
Ang Cebu City Government naka-release na og tag P5,000 ngadto sa 18,945 ka mga structure owner gikan sa gibana-banang 116,135 ka mga balay duha ka buwan ang nakalabay human sa bagyong Odette.
Base sa record sa Department of Social Welfare and Services (DSWS), 35,995 ka mga house owner maoy sunod nga mahatagan sanglit ang ilang mga dokumento nakumpleto na samtang ang 57,952 ka mga structure owners padayon pang giproseso ang ilang mga dokumento.
Ang Cebu City Government pinangulohan ni Mayor Michael Rama nangayo og P1 bilyon gikan sa City Council nga gipangulohan ni Bise Mayor Dondon Hontiveros aron gamiton alang sa recovery program sa dakbayan human sa bagyo.
ALANG SA SRP
Sa full council meeting nga gitambungan sa mga barangay kapitan, negusyante,mga ahensya sa kagamhanan ug uban pa pinangulohan ni Mayor Michael Rama isip chairman, tipik sa P1.6 bilyunes nga giaprobahan naglakip sa P868,728,000 nga debt services.
Alang kini sa prepayment sa loan sa South Road Properties (SRP).
Ang Siyudad nagtinguha sa pag-impas sa nahabiling P1.2 bilyunes nga nahabilin sa loan, apan giandam pa sa Siyudad ang tanang rekisitos nga gikinahanglan.
Ang Cebu City Treasurer’s Office niingon nga grabe ka daghan sa rekisitos nga maoy hinungdan nga wa nila mabayri sa dihang namunoan pa si anhing mayor Edgardo Labella kay nahutdan na sila sa panahon.
Nalakip sa AIP nga P1,610,022,790 mao ang P1.35 bilyunes nga institutional development and management; P256 milyunes alang sa social services; ug P1.5 milyunes nga economic concerns.