Ang forward sa New York Knicks nga si Obi Toppin midaog sa 2022 AT&T Slam Dunk Contest sa NBA All-Star Weekend didto sa Cleveland kagahapon.
Ang final dunk ni Toppin nga between the legs, tapped the ball off the backboard ug gitapos sa one-handed slam gihataga’g 47 puntos sa mga judges aron lupigon si Juan Toscano-Anderson sa Golden State Warriors.
Sa unang dunk sa finals mi-iskor og 45 si Toppin samtang 39 ang nakuha ni Toscano-Anderson. Apan nasipyat ang ikaduhang dunk ni Toscano-Anderson nga maoy nakapasigurado sa kadaogan ni Toppin.
Ang second dunk ni Toppin maoy milansang sa iyang kadaogan, 92-69.
Si Toppin maoy ikatulong player sa New York Knicks nga midaog sa NBA Slam Dunk contest uban nila Nate Robinson (2006, 2009, 2010) ug Kenny Walker (1989).
Si Houston rookie Jalen Green ug Orlando guard Cole Anthony wala maka-advance sa final round.
Sa laing bahin, usa ka surprisa ang resulta sa 3-point contest kay ang midaog usa ka big man.
Si Minnesota All-Star Karl-Anthony Towns miiskor og 29 puntos sa final round aron lupigon si Luke Kennard sa Los Angeles Clippers ug Trae Young sa Atlanta Hawks.
Wa maka-advance sa finals sila Patty Mills (Brooklyn), Fred VanVleet (Toronto), Zach LaVine (Chicago), Desmond Bane (Memphis), CJ McCollum (New Orleans).
Duwaon karong adlawa ang main event sa All-Star Weekend, ang All-Star Game ni Team Lebron batok Team Durant.
Ang starters sa Team Lebron mao sila Giannis Antetokounmpo, Stephen Curry, DeMar DeRozan, team captain LeBron James, Los Angeles Lakers ug Nikola Jokic, samtang sa Team Durant mao sila Joel Embiid, Ja Morant, Jayson Tatum, Andrew Wiggins ug Trae Young.
Ang team captain nga si Kevin Durant di makaduwa tungod sa injury.