Nalungkab ang balay ni NBA star Draymond Green didto sa Los Angeles, Estados Unidos, nakawat ang mga alahas, relo ug ubang pa nga butang nga nagkantidad sa $1 milyones o P51 milyones.
Matod sa balita sa TMZ Sports nga mitan-aw og Super Bowl LVI sa SoFI Stadium sa Los Angeles ang forward sa Golden State Warriors nga si Green.
Sa iyang pag-uli human sa duwa nadiskobrehan niya nga gilungkab ang iyang balay. Nasuta nga nawala ang mga mahalon nga gamit ni Green sama sa alahas ug mga relo.
Basi sa inisyal nga imbestigasyon, ang kawatan miagi sa bentana. Padayon pa nga nag-imbestigar ang mga polis og walay pay nadakpan nga suspek.
Managlahi nga reaksyon ang gipadangat sa netizens sa social media.
Adunay nagtuo nga basin kini usa ka inside job, samtang ang uban nanghinaot nga adunay insurance ang mga kabtangan ni Green para mabayaran ra ang NBA star.
“This was probably someone who been in your house. People are so grimy,” matod sa netizen nga si Vanessa Mcnis.
“Hopefully nothing too sentimental was stolen,” sigon ni netizen Dray Carter.
Ang 31-anyos nga si Green wala pa makaduwa sukad niadtong Enero 5 kay nagpaalim kini sa iyang lower back ug disc injury. Matod sa Golden State management nga posible kining makabalik human sa All-Star break.
Si Green usa sa pambato sa Warriors tungod sa depensa niini. Siya lakip sa tulo ka kampiyonato sa Golden State niadtong 2015, 2017 ug 2018.
Na-draft si Green isip 35th overall sa Warriors sa tuig 2012.
Nahimo siyang NBA Defensive of the Year sa tuig 2017 ug usa sad ka 4-time NBA All-Star ug 4-time All Defensive NBA team.
Nag-average si Green og 7.9 puntos, 7.6 rebounds ug 7.4 assists sa NBA 2021-2022 season. Sa iyang overall career sulod sa 673 games, adunay 8.7 puntos, 6.9 rebounds ug 5.4 assists nga average si Green.