Nag-atubang og kasong “Acts of Lasciviousness and RA 7610” si three-division world champion Johnriel Casimero kabahin sa panghitabo nga naglambigit og menor de edad niadtong Hunyo, 2021.
Ang Republic Act No. 7610 naila sab nga Special Protection of Children Against Abuse, Exploitation and Discrimination Act.
Ang Southern Police District mikompirmar sa GMA News Online nga adunay gipasaka nga kaso batok kang Casimero sa Taguig City Police Station niadto lang Pebrero 11, 2022.
Basi sa impormasyon nga nakuha gikan sa kasaligang tinubdan, ang kaso naglambigit sa alegasyon sa pagpangmolestiya sa usa ka 17 anyos nga babaye, kinsa giimbitar ni Casimero sa iyang lawak sa usa ka hotel.
Ang GMA News Online misuway pagkuha sa habig kang Casimero apan wala pa mitubag ang kasamtangang World Boxing Organization (WBO) bantamweight champion.
Hinuon, ang iyang igsuon ug sa samang higayon trainer nga si Jayson Casimero miingon nga ang sumbong usa lang ka “tumo-tumo” ug nasayod sila kon kinsa ang nagpaluyo niini.
Nidugang si Jayson nga ang abogado ni Casimero mopagawas og pamahayag kabahin niini.
Si Casimero, kinsa adunay 31-4, 21KOs nga rekord, kasamtangang nag-training sa Amerika alang sa iyang title defense batok kang British Paul Butler karong Abril 22, 2022 sa Liverpool, United Kingdom.