GIPAHIBAWO sa lokal nga panggamhanan sa Panabo City niadtong Lunes, Pebrero 21, 2022, nga ang City Health Office (CHO) nakatala og 36 ka kaso sa dengue gikan Enero hangtud Pebrero 21, 2022.
Ang 36 ka mga kaso nagagikan sa 14 ka mga barangay kon diin ang Barangay New Visayas maoy nakatala sa pinakadaghan nga kaso niini nga miabot og walo, gisundan sa San Viccente nga unom, samtang ang New Pandan, Gredu, Cagangohan, Sto. Niño pulos nakatala og tulo ka kaso matag usa.
Duha ka mga kaso ang natala sa mga barangay sa San Francisco ug San Pedro, ug tag-usa sa mga barangay Dapco, Katipunan, JP Laurel, Tibungol, Manay, ug Quezon.
"Gitutokan sa Panabo City Health Office ang kaso sa dengue sa siyudad, karong tuiga posibleng mag-taas kini tungod sa three-year dengue cycle," matud pa sa pahayag sa lokal nga panggamhanan sa Panabo nga napatik sa online niadtong Lunes, Pebrero 21.
Nagkompirma sab ang LGU-Panabo sa namatay nga 24-anyos nga lalaki gikan sa Barangay New Pandan tungod sa maong sakit.
Niadtong 2019, ang dakbayan sa Panabo nakatala og 933 ka kaso sa dengue nga miubos ngadto sa 299 pagka-2020 ug mas mitiurok pa gyud ngadto sa 285 nga kaso sa 2021.
Sa pahayag sa LGU-Panabo nagkanayon nga ang CHO padayon nga naglihok batok sa dengue sama sa "misting, indoor residual spraying, vertor surveillance," ug ang 4-S campaign" sa Department of Health nga mao ang "search and destroy mosquito-breeding sites, secure self-protection measures, seek early consultation, and support fogging and spraying in hotspot areas."