Obiena posibleng makaapil sa SEAG

MATOD ni Philippine Athletics Track and Field Association (PATAFA) president Ella Juico nga abli ang ilang pultahan alang sa paglakip kang pole vault Olympian EJ Obiena sa ilang listahan sa mga atleta nga mopakita’g aksyon sa Vietnam SEA Games karong Mayo, 2022.

Apan giklaro ni Juico nga sa kasamtangan, wala pa naapil ang world no. 5 sa ilang national pool tungod sa ilang kontrobersyal nga panagbangi.

Hinuon asoy ni Juico nga ang pagsalmot ni Obiena sa SEA Games puwedeng tukion sa mga opisyal sa PATAFA.

“Well, EJ Obiena is not in the national training pool list so we have to discuss that amongst ourselves from the PATAFA board as for the new list that we have submitted to the Philippine Sports Commission,” asoy ni Juico nga napatik sa www.gmanews.tv.

“He’s not in the list right now as we have announced on January 28 and we will have to look at his case if he wants to participate.”

Mismong si Obiena ang midesisyon nga dili na magpalakip sa PATAFA human siya gipasanginlan ni Juico nga miwaldas paggamit sa pundo nga gitagana alang sa iyang training.

Mao kini ang ugat sa ilang panagbangi.