Mga duwa karon
3:00 pm- Alaska
batok NLEX
6:00 pm- San Miguel
batok Phoenix
Inaton og suway sa Alaska Aces ang ilang sunodsunod nga kadaugan ngadto sa upat sa ilang pagpakigbatok sa NLEX Road Warriors sa premirong duwa karong alas 3:00 sa hapon, Pebrero 23, 2022, sa Philippine Basketball Association (PBA) Governor’s Cup conference sa Ynares Center sa Antipolo City.
Tungod sa tulo ka sunodsunod nga kadaugan sa Aces – duha niini nahitabo human mianunsyo ang team nga mobiya na sila sa liga human ning maong komperensya – hayan nakakatkat sila sa ikatulong dapit sa standing dala ang 5-2 nga rekord.
Tinguha sa Aces nga mobiya sila sa liga nga magbawon og kalampusan hinungdan nga tataw nga nadugangan og kadasig ang ilang mga sakop.
Giangkon ni Aces coach Jeffrey Cariaso nga gibati sab sila og pressure apan nakatutok sila sa usa ka misyon ug mao kini ang ilang gikinahanglan sa pagpakigbatok og lig-ong puwersa sama sa Road Warriors.
“With all due respect to our last two opponents, I feel tomorrow will be our biggest test since our resumption,” matod ni Cariaso nga napatik sa www.pba.ph.
“They have a phenomenal import with very good local support. They’re always a tough opponent.”'
Ang Road Warriors sikit nga nagsunod sa Aces sa standing bitbit ang 5-3 nga rekord.
Sa laing bahin, buakon sa San Miguel Beermen ug Phoenix Super LPG Fuel Masters ang ilang panagtabla sa 4-3 nga rekord sa ilang panagtagbo sa main game.
Ang Beermen ug Fuel Masters parehong nag-ilis og import sa pagbalik sa aksyon sa liga human kini nahunong sa hinapos nga bahin niadtong Disyembre sa miaging tuig tungod sa Covid-19.
Sa pag-abot ni Orlando Johnson sa Beermen, mitali og 1-1 nga rekord ang 1989 Grandslam winner ug mao sab kini ang rekord nga naposte sa Fuel Masters sa paghiabot sa ilang bag-ong import nga si Dominique Sutton.
Ang Beermen adunay dakong pagsalig sa abilidad ni Johnson.
“He showed what we expected of him. Alam namin magaling siya at malaki ang maitutulong niya sa team,” asoy ni San Miguel coach Leo Austria.