NAHUPAY ang gibate nga kabalaka sa gatusan ka mga residente sa Barangay Bankal ug Pajo, Dakbayan sa Lapu-Lapu, sa dihang wa mahinayon ang demolisyon.
Si Mayor Junard Chan mihangyo ngadto sa tag-iya sa luna nga lugwayan ang pagpapuyo sa mga lumolupyo sa Sityo Casia, Barangay Bankal, Lapu-Lapu City.
Niadtong Lunes, Pebrero 21 napugngan ang gikatakda nga demolisyon batok sa mga informal settlers sa maong dapit.
Si Chan personal nga mihangyo ngadto sa representante sa tag-iya sa luna nga si Brian Dosdos nga iuswag una ang pagpatuman sa demolisyon samtang nangita og relocation site alang sa 200 ka mga apektadong pamilya.
“Sayod mo sa kampanya nako nga ‘No Demolition, No Relocation.’ Makigsabot ta sa tag iya nga kong wa siya relocation ako, isip amahan, mo-provide og relocation,” tipik sa pamahayag ni Chan ngadto sa mga residente.
Apan kon way relocation site nga ikatanyag ang lot owner bisan og financial assistance ikatunol alang sa mga apektadong residente.
Misaad ang mayor nga mopuno sa kantidad nga magamit nga makatukod og laing balay ang maong mga residente ngadto sa ila bag-ong balhinan.
Laing option ni Mayor Chan nga ang kagamhanan maoy mopalit sa luna alang sa on-site development ug magpabilin ang residente diin ngadto na sila sa siyudad magbayad.
Sa sayo pa, niadtong miaging semana ang usa ka dapit sa Barangay Pajo ang gitakda sab nga papahawa-on ang mga lumolopyo sa luna nga pribadong gipanag-iya. Kini human gihangyo ni Chan ang huwes nga kahatagan og extension ang pagpabilin sa mga residente, ilabi na nga sa sunod buwan adunay husay nga ipahigayon may labot sa maong isyu.