PROTEKTAHAN sa Magnolia Ang Pambansang Manok Hotshots ang ilang limpyong rekord sa ilang pagpakigbatok sa NorthPort Batang Pier sa main game karong alas 6:00 sa gabii sa Philippine Basketball Association (PBA) Governor’s Cup sa Ynares Center sa Antipolo City.
Ang Hotshots kasamtangang nag-una sa standing dala ang 6-0 nga rekord ug nakaseguro na’g luna sa quarter-finals apan nagkinahanglan gihapon nilang mokayod og maayo alang sa inilugay sa top two spots nga nagtangag og twice-to-beat nga benepisyo.
Sa ilang bahin, ang Batang Pier nagkumpayot sa ika-11 nga puwesto dala ang 1-5 nga rekord apan wala kini nagpasabot nga wala na sila’y dag-anan batok sa league-leader Hotshots.
Puno sa kadasig ang puwersa sa Batang Pier gumikan kay gikan sila sa makapakugang nga kadaugan batok sa usa sa mga gikahadlukan sa komperensya nga mao ang Meralco Bolts, 109-98.
“Nasa ilalim kami, pero fight lagi. Kahit papaano we got the monkey off our backs. I think this is the time to start winning,” matod ni NorthPort coach Pido Jarencio.
Sa premirong duwa, ang Bolts makigsangka sa Terrafirma Dyip sugod sa alas 3:00 sa hapon.
Ang Bolts kasamtangang naa sa ikaduhang puwesto bitbit ang 5-1 nga rekord samtang ang Dyip anaa sa ika-10 nga luna bitbit ang 2-5 nga baraha.