GIABSUWELTO sa Sandiganbayan si anhing Ronda, Cebu Mayor Mariano “Nonie” Blanco III ug laing lima ka mga opisyal sa lungsod sa kasong graft tungod sa giingong kapakyas pag-post og bid notices sa website sa gobyerno niadtong 2012.
Giabsuwelto sa Sixth Division sa Sandiganbayan sila si Blanco, Municipal Engineer Oscar Pilapil, Municipal Budget Officer Thelma Landiza, Assistant Treasurer Brigida Cabaron, Municipal Clerk Frauline Requilme ug Utility Worker Evelina Tan tungod sa alegasyon nga ilang gilapas ang Republic Act (RA) 3019 o ang Anti-Graft and Corrupt Practices Act.
Ang kaso batok kang Blanco ug kauban niyang mga opisyal sa lungsod gibase sa reklamo nga gisang-at batok kanila tungod sa kapakyas sa pag-post sa invitations to bid (ITBs) sa Philippine Government Electronic Procurement System (PhilGEPS) gikan niadtong 2012 hangtod 2013.
Matod sa Ombudsman, sila si Blanco ug iyang mga kauban napakyas pag-post sa ITBs alang sa 15 sa 16 ka procurement projects nga naglambigit sa pagtukod sa CL School Building sa Madanglog Elementary School; mga tambal ug materyales alang sa pagmentinar sa mga publikong edipisyo ug mga materyales sa pagtukod alang sa pagkompleto sa usa ka barangay health center sa Barangay Butong; pagtukod sa barangay hall sa Barangay Langin; pagtukod og emergency access road sa Poblacion ug Planas-Oval-Poblacion; pagmentinar sa mga karsada ug paghatag og suplay sa kuryente, mga materyales alang sa pagtukod sa Butong Day Care Center ug pagtukod sa legislative building sa lungsod.
Ang anti-graft court mimando usab nga ang kasamtangang hold departure orders batok sa mga akusado tangtangon ug ihiklin samtang ang ilang katugbang nga piyansa ipagawas.
Sa unom ka mga respondents, sila si Landiza, Cabaron, Requilme ug Tan ang nakaangkon og hustisya samtang sila si Blanco ug Pilapil namatay sa wala pa ang desisyon.