DILI magpabulasot sa lungag sa kumpiyansa si Gilas Pilipinas coach Chot Reyes sa ilang pagpakigbatok sa India karong alas 3:00 sa hapon sa FIBA World Cup Asian qualifiers sa Araneta Coliseum.
Taliwala sa dakong gintang sa duha ka teams sa world rankings – No. 33 ang Gilas Pilipinas ug No. 80 ang India – nasayod si Reyes kon unsa’y bawon nga hulga sa puwersa sa India ning higayuna.
Numero unong gikabalak-an ni Reyes mao ang bintaha sa mga magduduwa sa India sa gitas-on ug gidak-on.
Matod ni Reyes nga dako sab ang kalambuan sa puwersa sa India ubos sa paggiya ni Serbian coach Veselin Matic.
“No. 1 is India’s size. They’ve had over the years right before our eyes, we’ve seen India develop and grow into a legitimate basketball competitor,” matod ni Reyes nga napatik sa Spin.ph.
Ang gitas-on sa line-up sa India nag-average og 6’6” nga gipangulohan ni 7-foot-2 center Princepal Singh, kanhi nagduwa sa National Basketball Association (NBA) G League Ignite team.
“Their skills have tremendously improved and with the way coach Matic is with them, we’re very certain that they’re going to be well coached and well prepared. That’s the thing I told our team, we have to completely be ready for a very tough team against India,” dugang ni Reyes.
Sa kinatibuk-an, ang Philippine national squad adunay 18-4 nga rekord batok sa India.
Apan sa katapusang panagsangka sa duha ka teams, gipakaging sa India ang Pilipinas, 91-83, sa 2016 FIBA Asia Challenge sa Tehran, Iran.