KADUHA na napriso tungod sa pagpamaligya og ilegal nga druga apan wa pa gyod nahadlok -- nasikop na sab sa Philippine Drug Enforcement Agency (PDEA)-Davao Region ang usa ka 60-anyos nga lalaki atol sa gikasa nga buy-bust operation alas 2:40 sa hapon niadtong Pebrero 24, 2022, didto sa Westbend Street, San Antonio Village, Matina, Davao City.
Subay sa taho sa PDEA-Davao Region, usa ka hiniusang operasyon ang gilusad pinaagi sa PDEA-Special Enforcement Team ug sa National Bureau of Investigation-Davao Region.
Giila sa kapulisan ang suspek nga usa ka alyas Vic/Tata, kinsa giingong number 1 sa City Target List sa awtoridad.
Nakuha sa posisyon sa dinakpan ang dakong sako sa pakite sa gituohang shabu nga nagkantidad tanan og P285,000 mga nagkadaiyang drug paraphernalia, buy-bust marked money ug ang boodle money.
Nasayran nga napriso na ang suspek sa kalapasan sa ilegal nga druga niadtong Marso 2004 kinsa nakapiyansa, ug nadakpan na sab kini niadtong Disyembre 2014, kinsa nakagawas sa prisohan Oktubre 2019 pinaagi sa plea bargaining. Apan wala mitagam, mibalik na sab sa iyang binuhatan.
Gipaslak na karon sa selda sa PDEA ang nasampit nga dinakpan.