ANG no. 5 sa most wanted persons list sa kapulisan sa probinsiya sa Bohol nadakpan atol sa region-wide Simultaneous Anti-Criminality and Law Enforcement Operation (SACLEO) sa Purok 1, Barangay San Roque, lungsod sa Talibon, pasado alas 12:00 sa tungang gabii kagahapon, Pebrero 25.
Usa ka joint operation sa Talibon Police Station nga gipangulohan ni Police Major Gereon Item niresulta sa pagkasikop sa suspek nga si Raindro Gabas Buno, alyas ‘Wally’, ‘Bigbig’ o ‘Sendoy’, 48, molupyo sa Brgy. San Vicente sa Trinidad, Bohol.
Ang tigpamaba sa Bohol Police Provincial Office (BPPO), Police Lieutenant Thomas Zen Cheung, nibutyag nga ang pagdakop kang Buno pinaagi sa hiniunang pwersa sa Criminal Investigation and Detection Group - Bohol Field Unit (CIDG-BFU), Provincial Intelligence Unit (PIU), Provincial Mobile Force Company (PMFC) ug ubang units.
Matod ni Cheung, si Buno dunay usa ka kasong murder ug unom ka mga kaso nga frustrated murder.
Si Judge Azucena Macalolot-Credo sa Branch 101 sa Regional Trial Court (RTC) Talibon maoy niluwat sa warrant of arrest alang sa kasong murder batok kang Buno nga walay piyansa nga gitugot.
Samtang si Judge Sisinio Virtudazo sa Branch 51 sa lungsod sa Carmen, Bohol maoy niluwat sa warrant of arrest alang sa unom ka mga count nga kasong frustrated murder nga way piyansa.
Nasayran nga si Buno usa ka mag-uuma apan, matod sa kapulisan, aktibong miyembro sa walhong kalihukan nga sakop sa Squad 2, SYP Platoon sa mga rebeldeng New People’s Army (NPA) ug kanhi usab chairman sa Talibon Trinidad Integrated Farmers Association (TTIFA)
Siya kasamtangang karon gitanggong sa BPPO.