SA nagdako pa akong kaluha, paborito nakong basahon ang mga sinuwat ni Lynn Louise Wonders kay kanunay man siyang maghatag og mga bulawanong tips kon unsaon pagpadako ug pagmatuto sa mga bata sa sayong pangidaron.
Ang iyang mga praktikal tips maoy akong gihimong sumbanan sugod sa 2 anyos pa ang mga bata hangtod nga ila kining nadala sa ilang pagkahamtong nga mga independenti, responsabli, matinabangon ug mahadlukon sa makagagahom.
Sa edad nga 2 anyos, akong gihinayhinay pagtudlo ang mga maayong pamatasan nga mao say akong ikabahin karong adlawa sa akong lindog.
Ang ginikanan maoy unang modelo sa ilang mga anak. Dunay panulltihon nga ‘sa mata ng bata ang ginagawa ng matanda ay tama’, busa angay panaminan ang kina-iya, kalihukan ug mga pulong nga moguwa sa baba sa mga hamtong nga nagpalibot nila kay ila man kining tan-awon, paminawon og sundon.
Ang simpling mga ehimplo ini ang paglitok sa pulong “thank you, please o sorry ” bisag unsa pa ka gagmay sa butang o kalihukan nga nahimo sama sa paglabay sa basura, pagluto, panglimpyo o pag-abre sa pultahan. Himuon kini sa sensirong paagi nga dunay eye contact kay ang imong gamay nga ‘copycat’ segurado mosunod man ini.
Ayaw ihikaw ang pagpasalamat nila sa ilang maayong binuhatan, bisag unsa kini ka gamay, labi na og mo kooperar, magpakita og kaayo, maayong gawi o mo-behave. Pina-agi ini o sa pagdayeg, ma-ingganyo ang mga bata pagbuhat og mas daghan pang maanindot nga binuhatan.
Ayaw pasubrahi ang paghatag og gasa. Ang subrang mga regalo panahon sa birthday o Pasko makapahuna-huna sa bata nga mas nindot ang daghang regalo unya di na hinuon kini makontento o malipay kon gamay ra ang madawat imbis e-enjoy ang pag-gamit o duwa ini.
Mas maayo sab nga ang bata magdako nga ganahan mo basa og libro imbis magduwa og mga electronic gadgets kay delikadong ma-ungo kini sa mga electronic games unya wa na hinuoy gana magtuon o mo eskwela gawas nga makadaot kini sa mata.
Hinumdumi, mas sayo, mas maayo!