Mipabuhagay dayon og impresibong performance si James Harden sa iyang unang duwa sul-ob ang uniporme sa Philadelphia 76ers batok Minnesota Timberwolves 133-102, sa NBA regular season game kagahapon sa Minneapolis, Minnesota.
Mipupo si Harden og 27 puntos, 12 ka assists ug walo ka rebounds sa iyang unang duwa human siya gi-trade sa kanhing team Brooklyn Nets ilis nila ni Ben Simmons, Seth Curry, Andre Drummond ug duha ka first round draft picks.
Wa pud kapugngi ang pwersa sa 76ers’ bigman Joel Embiid nga mikamada’g 34 puntos uban sa 10 ka rebounds aron tabangan si Harden sa paglubong buhi sa Timberwolves sa ila mismong balwarte.
Matod pa ni Harden nga iyang trabaho sa pag-abot sa 76ers mao ang pagdugang sa pwersa sa team ug pagtabang nga molambo ang individual performance sa iyang mga kauban.
“We’re unselfish, we just want to win,” batbat pa niini. “We’ve got guys, from top to bottom, that it feels that way on the court. Great things are going to happen more times than not.”
Sa pag-abot sa 2018 MVP nga si Harden, naglaom ang Philadelphia nga makatabang unya kini sa ilang playoff run. Ang 76ers naghupot og 36-23 nga baraha, anaa sa ikatulong pwesto sa Eastern Conference team standings.
Ang Minnesota gipangulohan ni Karl-Anthony Towns ug D’Angelo Russell nga adunay 25 ug 21 puntos.