Giingong hitman sa usa ka piniriso sa Minglanilla Municipal Jail nadakpan sa buy-bust sa alas 10 sa Biyernes sa gabii, Pebrero 26 sa Barangay Mabolo, Dakbayan sa Sugbo.
Lakip nga naposasan ang agawon niining babaye.
Si Police Lieutenant Bonifacio Tañola, team leader sa Regional Police Drug Enforcement Unit (RPDEU) 7, niila sa suspek nga si Regine Melorin Garciano, 25, kinsa maoy gipalitan sa nagpailang puseur buyer.
Nasakmit gikan kang Garciano nga gituohang shabu motimbang og 450 gramos nga mobalor og P3 milyones subay sa street value.
Lakip usab sa nadakpan si Steven Cedeño Lazarraga, 24, kinsa naimbargohan og kalibre .45 nga pistola nga dunay tulo ka mga bala.
Si Lazarraga mag-atubang og kaso nga kalapasan sa Republic Act 10591 kun ilegal nga paghupot og armas ug paglapas sa Commission on Elections (Comelec) gun ban.
Samtang si Garciano pasakaan og kasong pagpamaligya og illegal nga drugas nga kalapasan sa Republic Act 9165 kun Comprehensive Dangerous Drugs Act of 2002.
Si Police Lieutenant Colonel Ronnie Failoga, regional chief sa RPDEU 7,nibutyag nga ang ilang pagdakop kang Garciano naplano human ang iyang ngalan nigawas gikan sulti sa ilang mga nadakpan nga nitug-an nga gikan kang Garciano ang nangasakmit nga drugas.
Usa ka buwan nga ilang gipanid-an ang suspek.
Dugang ni Failoga nga sa pag pangutana sa iyang mga sakop, nasuta nga ang kapikas ni Garciano kasamtangang napriso sa Minglanilla Municipal Jail samtang si Lazarraga giingong maoy hitman sa kapikas ni Garciano.
Si Lazarraga maoy giingong mopatay sa mga durugistang di makabayad.
Gikonsidera usab si Garciano nga regional high value individual tungod sa gidaghanon sa shabu nga nasakmit lakip na mabaligya niini matag semana nga dili moubos sa tunga sa kilo.
Si Garciano nanghimikak nga siya drug pusher kay tighatod lang siya ug gipauban lang niya si Lazarraga.
LAPU-LAPU
Samtang namaligya sa ilegal nga drugas ug kustomer niini dungan nga nasikop sa mga operatiba sa City intelligence Unit (CIU) sa Lapu-Lapu City Police Office sa alas 11 sa Biyernes sa gabii, Pebrero 25.
Ang grupo ni Police Lieutenant Noah Añana, sa City Drug Enforcement Unit (CDEU), ubos sa kamandoan ni Police Lt. Colonel Jul Mohammad Jamiri, maoy nangu sa buy-bust pasado alas 11:00 sa Biyernes sa gabii sa Sitio Camansi, Barangay Pajo.