Usa sa mga paboritong suroyanan sa mga mountain biker mao ang mga isla sa Camotes. Bisan ang akong mga higala mobisita panagsa sa labing dako sa mga isla sa Camotes. Sagad mangadto sa weekend ang bikers.
Kadaghanan nila manubay sa main roads sa Camotes, gikan sa San Francisco padung sa Poro o sa Tudela. Mas daghan kong nakit-an sa Poro, panagsa ra sa Tudela. Apan kon sama ka nako, sakto ang rota sa Poro gikan sa San Francisco kay medyo challenging.
Mosaka ka padung sa Barangay Tiguis nga naa lang sa wala nga bahin human nimog tadlas sa karsada nga nagdugtong sa San Francisco ug Poro. Short climb ra na ug rough pa kaayo. Lisod sab i-maneuver kay rough kaayo ang short climb.
Gikan sa Tiguis di na kaayo challenging, apan paglabay nimo sa pipila ka mga barangay, duna nay panagsa ug dayon tag-as nga mga climb. Nindot ni kon sama nako hilig og climb. Apan kon ganahan ka og gamay nga challenge, adto ka agi sa Tudela kay nindot ug hamis ang ilang karsada. Gamay ra kaayo ang climb.
Kon ganahan ka og challenging nga climb ug downhill, saka sa karsada padung sa Brgy. Alta Vista, sakop sa Poro. Naa ni kilid sa Landbank, kanang nagsanga nga karsada padung sa Tudela. Kana kay sige rang saka, way dulhog, apan dunay portions nga patag.
Ang mas challenging kuno, kay wa man sab ko makalahos, ang tumoy ini nga nagkonektar sa ubang mga barangay. Rough ang padulhog nga tungod ini, daghan sa mga motor di moagi, mobalik gyud.
TRAILS
Daghan sang trails ang Camotes, labina sa side sa Poro. Ang kakuyaw lang lagi kay ang mga bato lahi sa naandan nato kay daghan ani corals nga nagpabilin human sa minilyon nga katuigan. Hait ang mga bato itandi sa atoang kabukiran sa mainland. But makalingaw kaayo ang trails, very challenging.
Ang nakanindot gud sa Camotes kay luwas kaayo ka sa pagsuroy. Bisan gani sa bikepacking, nindot ang isla alang niini. Laid back pa gihapon ang kinabuhi sa isla bisan kon daghan na ang mga turista nga namisita sa dapit.
Lahi sa Bantayan islands, ang Camotes dunay kabukiran nga nindot kaayong tadlason. Nindot tuod ang mga karsada, apan suot sa iyang mga suok kay mas makalingaw. Lahi kaayo ang imong ma feel sa environment tungod sa kadaghan, kadagko sa mga kahoy ug kamingaw sa mga dapit.
Di ka sab makatuo nga sa kagamay sa Camotes duna ni kahumayan ug dunay kamaisan. Naa pa gani ni irrigation system nga dugay na kaayo.
TRANSPORTASYON
Di lang hinuon sayon ang pag-adto kon season na sa turismo tungod kay kinahanglan kang mag advance booking. Kadagahn na ko makasuway ani. Lisod ang transportasyon sa pag-adto ug pagpauli basta season sa turismo. Kana kasagaran naa sa Abril ug Mayo.
Busa karong mga panahuna nindot pa iadto, ibisita. Kay kon imong huwaton ang summer, lisod kaayo ang pagsakay.