Mongaya: Buhian si De Lima

Nasiguro ko nga daghang masuko sa mga mokomentaryo niining atong lindog. Apan kon atong basahon ang ilang mga punto, layo ra kaayo kini sa mga punto legal. Pulos na lang kini binastos ug ibalik ang mga gisulti sa mga testigong walay klaro.

Kay kon sunodsunod pa ang mga hearing sa kaso ni Sen. Leila de Lima, dugay na unta nanga dismiss ang tanang mga kaso batok kaniya. Wala may lig-ong ebidensiya batok kaniya.

Dugay na nga angay buhian kining usa ka binilanggong politikal.

Mao kini ang gihisgutan atol sa usa ka press conference nga gipahigayon nilang kanhi Akbayan party list representative Tom Villarin diha sa Pagtambayayong HQ sa Private, Cebu City.

Posible hinuon nga mangalyas na lang ang mga hinanib sa mga dautan kay akong giunhan. Apan, naa baya gyuy mga baga og nawong. Di na sila makontento kon dili mapadayag ang mga bakak aron lang gyud makakwarta.

Private Port

Nagkanayon si Villarin nga apil sa kawsa ni Sen. De Lima mao kining private port nga nagtukod og 25 ka hektaryang reclamation project diha sa Tanke, Talisay. Ipaimbestigar kini sa senador.

Ang pagsud-ong sa maong proyekto ug pagpahibawo sa mga residente nga motabang mao usab ang tuyo ni Vice President Leni Robredo ug Sen. Kiko Pangilinan sa pag-adto sa maong dapit sa miaging Pebrero 24.

Ang maong proyekto gipanag-iya og mga dagkong negusyante nga suod sa Malakanyang. Kalit kining nitumaw nga walay dialog sa mga residente.

Nagkanayon si Joksan Branzuela nga ilang suknaon ang Cebu Port Authority (CPA) ug ang Department of Environment and Natural Resources (DENR) nganong nahatagan og permiso ang maong proyekto.

Atong nasayran nga sunod semana, magkita ang mga abogado sa mga residente ug si Chel Diokno, human rights lawyer nga nilansar sa tiket ni Leni ug Kiko.

Ato sab nga nasayran nga kadaghan na nakamiting ang maong mga residente kanilang Vice Governor Junjun Davide ug kanhi tourism secretary Ace Durano. Teritoryo diay kini sa giingong Kalihokang Leni-Ace-Junjun.

Mas dakong rali

Nagkanayon ang pipila ka mga Leni volunteers nga sunod balik ni Leni sa Sugbo, malabwan pa ang rali nga gipahigayon sa Siyudad sa Ilo-ilo.

Aw, di man sab kahibudngan ang Ilo-ilo kay si Mayor Jerry Treñas dapig man daan kang Leni. Ang sa Cebu kay lihok halos tanan sa mga volunteers. Dayon naa pa gyuy mga problema sa koordinasyon tungod sa lokal nga politika.

Apan alang kanako, lahi gyud unta ang mahitabo inig balik ni Leni. Pananglitan, dili na usbon kining magkalahi ang venue sa mga rali. Usa na lang ka dakong rali dinhi sa Metro Cebu.

Kon dili man mahimo sa Plaza Independencia o sa dakong football field sa Abellana, naay mga dagkong hawan diha sa Mandaue Reclamation.

Ang mga lider ug boluntaryo sa amihanan, habagatan, ug kasadpan sa isla sa Sugbo magpahigayon og higanteng mga caravan nga salmotan sa mga delegasyon gikan sa lainlaing mga lungsod nga maagian.

Nakahibawo na man kita nga ang mga dagkong lider diha sa second, fourth, ug seventh district sekretong nagsuporta kang Leni. Malaumon ako nga mas mokumpyansa na sila nga mailhan inig makabantay sila nga mas nidako pa ang suporta ni Leni.

Mosalig kita kanila nga maoy mag-una sa mga mobilisasyon. (DM nako sa @anol_cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph