Kapin sa duha ka buwan human nikuso-kuso ang bagyong Odette (Rai) sa Sugbo, wa pay kuryente ang pipila ka bahin sa lungsod sa Cordova hinungdan nga nidangop ang mga residente sa ilang mayor aron mangayo og tabang.
Si Cordova Mayor Mary Therese “Teche” Sitoy-Cho nitubag pinaagi sa pagpadalag mga suwat ngadto sa Mactan Electric Company (Meco), nga nagpakisayod nganong wala tumana sa distribution utility ang ilang pasalig nga ibalik ang kuryente sa lungsod sa Enero 20.
Apan giingon sa Meco nga wala sila naglapas sa ilang saad.
“It has been two months since the super typhoon hit the entire Cebu Province and until now some of our constituents agonize in the aftermath of the typhoon,” matod ni Sitoy-Cho sa iyang suwat ngadto kang Meco senior vice president ug general manager Gilbert Pagobo sa Pebrero 22.
Iyang gipahinumdoman si Pagobo nga atol sa ilang tigom tali ni Gob. Gwendolyn Garcia sa Enero 5, “you have said that you will restore and reconnect the electric lines in our municipality 15 days from the said date,”
Nanawagan siya alang sa dinalian nga aksyon bahin niini.
Sa sayo pa, niadtong Enero 21, si Sitoy-Cho nisaway usab sa Meco tungod sa pag-anunsyo niini sa Facebook page niadtong Enero 19 nga ang pag-ayo niini ug pag-ayo sa nangatumba nga poste sa Cordova nababagan sa road widening program sa Cordova local government unit (LGU). Ang mayor nipahibawo kang Pagobo nga ang road widening program nga gikuwestiyon proyekto sa Department of Public Works and Highways-District 6, ug dili sa LGU.
Ang post sa Meco maoy hinungdan nga nasayop ang mga residente sa pagbasol sa nalangan nga pagpabalik sa kuryente sa lungsod ngadto sa LGU.
Sa iyang suwat niadtong Enero 21, nangutana siya nganong walay nagpakabana bisan usa gikan sa Meco sa pagpakigsulti sa LGU kon tinuod ba nga nagtuo kini nga ang pagpalapad sa karsada usa ka proyekto sa LGU nga unta duha ka adlaw human sa bagyo sa Disyembre 16, ang LGU ni-contact sa Meco ug nitanyag og tabang para mapadali ang clearing works.
Gi-post sa mayor ang mga kopya sa iyang mga sulat sa Facebook page sa lungsod.