Tiguwang lalake nidunggab patay sa babayeng iyang gikarelasyon alas 12:10 sa Biyernes sa kaadlawon, Pebrero 25, sa Barangay Lagunde, lungsod sa Oslob human gituohang gibalibaran siya sa pagpakig-sex.
Si Fely (di tinuod nga ngan), 46, minyo, taga Brgy. Caseres, lungsod sa Oslob, namatay kay nakaangkon og mga samad dinunggaban sa ubos sa walang totoy, tiyan ug kamot.
Si Fely namatay alas 2:00 sa hapon sa Biyernes sulod sa Vicente Sotto Memorial Medical Center (VSMMC) dakbayan sa Sugbo samtang wa pa madakpi si Gomercindo Laguna, 66, minyo, negusyante, taga Brgy. Lagunde.
Si Police Staff Sgt. Nelson Saquibal, imbestigador sa Oslob Police Station nga nahinabi Superbalita Cebu nagkanayon nga dugay nang may relasyon sila si Fely ug Laguna.
Si Fely giingong walay maayong relasyon sa bana ingon man si Laguna sa iyang asawa.
Sa wala pa ang hitabo, sumala ni Saquibal nga giimbetar ni Laguna si Fely nga manuroy sa Quartel nga nahimutang sa likod sa Oslob Munipal Plaza sa Barangay Poblacion.
Kay nasuod na ni Laguna ang pamilya, giuban ni Fely ang iyang duha ka mga anak nga dalaga.
Namalit silag makaon sa 711 sa duol ug nag-enjoy sa ilang pagpanuroy.
Human matagbaw sa paglingawlingaw, si Laguna niagni kang Fely nga moadto sila sa usa ka bakanting balay sa Brgy. Lagunde, apan gikuyog sa inahan ang iyang duha ka mga anak.
Hinuon, sila ra si Laguna ug Fely ang nanulod sa balay samtang ang duha ka mga anak didto sa baybayon.
Matod ni Saquibal nga kalit lang nagkalalis ang duha, nibunot sa iyang gidala nga kutsilyo si Laguna ug gidunggab si Fely.
Nakasagang sa unang hansak si Fely hinungdan nga nasamad ang iyang mga kamot, apan sa sunod nga mga dunggab naigo na siya sa lawas.
Ang mga anak nga nakakita nga gidunggab ang ilang inahan nisinggit og pakitabang.
Si Laguna dali sab nga nakasibat samtang si Fely gidali sa pagdala sa Oslob District Hospital apan gibalhin dayon sa VSMMC.
Matod ni Saquibal nga usa sa ilang gitan-aw nga motibo ang selos kay ilang nasayran nga dunay laing hinigugma si Fely.
Nagtuo usab si Saquibal nga nanghagad na sab og sex si Laguna, apan gibalibaran sa biktima hinungdan nga nasuko na og maayo.
Iyang nasayran nga si Laguna tighatagan og allowance ni Fely ug hatagan pa kini niya og kwarta kon mangayo.
“Gihatag na daw niya ang tanan, unya nikuyog pa sa laing lalake,” dugang ni Saquibal base sa iyang imbestigasyon.