HUMAN sa siyam ka malampusong mga depensa sulod sa pito ka mga tuig, nalangkatan na sa iyang titulo si Filipino world champion Jerwin Ancajas pinaagi sa unanimous decision nga kapildihan batok ni Fernando Martinez sa Argentina kagahapon, Pebrero 27, 2022 (RP time) sa The Chelsea, Las Vegas, Nevada.
Ang tulo ka judges nga sila si Max De Luca (117-111), David Sutherland (118-110) ug Steve Weisfeld (118-110) pulos mitali sa ilang scorecard nga pabor sa batan-ong Martinez kinsa mipakita sa iyang kaagresibo aron dominahon ang away.
Ang kadaugan sa 30-anyos nga Martinez maoy nagputol sa usa sa pinakadugay nga dominasyon sa kampiyonato sa kasaysayan sa boxing.
Sa kadaugan, si Martinez kinsa adunay 14-0, 8KOs nga rekord, mao na karon ang naghupot sa International Boxing Federation (IBF) junior bantamweight championship, ang titulo nga naangkon ni Ancajas sukad niadtong Septiyembre, 2016.
Sa interview ni Jim Gray sa Showtime human sa away, si Ancajas (33-2-2, 22KOs) mipadayag nga gusto niyang makig-rematch ni Martinez (14-0, 8KOs). Sa ilang kontrata adunay rematch clause nga nalatid.
Plano unta sa kanhi title holder nga moaway batok ni World Boxing Organization (WBO) champion Kazuto Ioka sa Japan alang as unification fight sa summer apan sa iyang kapildihan batok ni Martinez, daw mihanap ang maong laraw.
Gikan pa lang sa sinugdanan, epektibo kaayong migamit si Martinez sa iyang wala ug tuo nga kombinasyon.
Sa ika-10 nga round, ang referee nga si Jack Reiss miduol ngadto sa corner ni Ancajas aron ipahimangno ang mga kumo nga nadawat niini sulod sa siyam ka mga rounds.
Pipila ka mga higayon nga daw og sa mibarag si Ancajas human nahilam-os sa mga kumo nga gipauwan ni Martinez. Si Ancajas misaka sa ring nga dakong inilog.