USA ka 24-anyos nga drayber sa motorsiklo ang namatay ug usa ka sundalo ang angol sa insidente atol sa Commission on Elections (Comelec) checkpoint sa San Isidro Road, atubangan sa barangay hall sa San Isidro, dakbayan sa Talisay, pasado alas 2:00 sa kaadlawon sa Dominggo, Pebrero 27.
Sumala sa kapulisan, ang motorsiklo sa batan-on nisutoy sa checkpoint, gibanggaan ang usa ka sundalo ug kini nabangga sa trak sa basura nga nag-park daplin sa dalan.
Mao kini ang asoy ni Police Lieutenant Elwood Ibona sa Talisay City Police Station sa Superbalita Cebu sa ilang pagpahigayon og checkpoint uban ang mga sakop sa 82 Infantry Battalion.
Si Ibona niila sa namatay nga si Kyle Ryan Ong, 24, ug molupyo sa Sityo Quimba sa Barangay Cansojong, Talisay.
Matod ni Ibona, si Ong giabisohan nga mohinay sa Comelec checkpoint nga nagpahigayon og inspeksyon nunot sa election period.
“Imbes mo-slow down, niarebolusyon hinuon siya. Nilabay pa sa tulo ka pulis hangtud nga naigo pa niya ang sundalo nga nagpahunong pud sa unahan mao to nga naigo ang sundalo,” asoy ni Ibona.
Giila ni Ibona ang sundalo nga naangol nga si Private First Class Michael Borromeo, hingkud, ug sakop sa 82 Infantry Battalion.
Sa kusog ang impact sa pagkabangga ni Ong sa trak sa basura hinungdan sa iyang hinanaling kamatayon, matod ni Ibona.
Ang sundalo dunay bali ang tuong bukton ug dughan ug nalandig sa tambalanan.
Dugang ni Ibona, ang Scene of the Crime Operatives (Soco) dunay nakuha nga kuwarta, selpon ug, matod pa, usa ka toy gun gikan kang Ong.
Samtang, si Atty. King Perez, ig-agaw sa namatay, nagkanayon nga atol sa pakighinabi sa Superbalita Cebu kagabii, Pebrero 27, ipa-autopsy pa nila ang lawas sa iyang ig-agaw aron pagsuta sa matuod nga hinungdan sa kamatayon niini.
Si Perez nipadayag sa pagduda sa spot report sa kapulisan bahin sa hitabo apan nagkanayon, "we (family) are willing to cooperate with the police."
Ang kapulisan gikataho nga mohimo pa og dugang imbestigasyon sa hitabo.