MALIPAYONG pagsaulog sa ika-86 nga Araw ng Dabaw! Kung sa tawo pa, "super-senior citizen" na ang atong dakbayan. Apan giingon nga kabaw ra ang matiguwang kay nisutoy man sa daghang kabag-ohan ang Davao.

Kaniadto ginahimo ang atong kasaulogan matag Marso 16 tungod kini ang petsa sa pagka-siyudad niini sa Marso 16, 1937. Apan subay sa Republic Act 11379 niadtong 2019, gibalik ang naandang petsa sa ngadto sa Marso 1. Nahimong "chartered city" ang Davao pinaagi sa Commonwealth Act 51, sa National Assembly niadtong Oktubre 16, 1936.

Atong balikon ang kasaysayan nga gimugna ang Davao ni Datu Bago niadtong 1830 ug gitawag nga Pinagurasan. Paghiabot ni Don Jose Cruz de Oyanguren of Guipuzcoa, Spain niadtong Hunyo 29, 1848 gitawag kini niya og Nueva Vergara hangtud nga giusab kini ngadto sa Davao sa tuig 1867.

Ang pangalan nga "Davao" nagagikan sa pulong nga "Davah" sa tribong Bagobo o Obos nga maoy tawag nila sa karong Davao River ug lugar diin nagpuyo ang katawhan sa bukana sa suba.

Ang tribong Clatta o Giangan/Diangan nagtawag usab sa suba nga "Dawaw" samtang ang tribong Tagabawa natawag niini nga "Dabo." Sa census niadtong 2020, nikabat na'g 1.7 milyon ang Dabawenyo samtang nagpabilin kining ika-3 nga siyudad sa nasud sa gidaghanon sa population.

Niadtong 2020 niabot og P11.1 trilyon ang kinatibuk-ang kita sa dakbayan. Apan bisan sa dakong kita ug sentro kini sa komersiyo ug edukasyon sa Mindanao, nikabat gihapon og 9.20% (2015) ang "Poverty Incidence" o usa sa matag 10 ka Dabawenyo ang kabus. Mora'g mapun-an pa ang insidente sa kapobrehon tungod sa Covid-19 pandemic.

Busa sukad niadtong Marso 2020, giwala na ang daw pista nga selebrasyon sa Araw ng Dabaw, hinunua ginahimo nga "online celebration" hangtud karong tuiga.

Atong mahinumdoman nga taliabot ang Araw niadtong 2020 sa dihang nikuyanap ang Covid-19 dala sa mga natakdan nga sobra 30 ka sabongero nga niapil sa derby diha sa Matina Gallera. Daling nagdeklara si Mayor Sara Duterte-Carpio sa kuwarentinas aron dili pa modaghan sa matakdan ug ang sunod anaa na karon sa atong kasaysayan sa pagkombati sa pandemya.

Sakto ang gibuhat sa atong lokal nga kagamhanan nga padayon ang "online celebration" kay gawas nga posible kining mahimong "super-spreader" sa virus, dako sab ang gasto niini.

Mas maayo nga magamit ang pundo sa serbisyong sosyal sa katawhang kabus, ayuda sa mga drayber tungod sa pagsaka sa presyo sa lana, mga mananagat ug mag-uuma nga nawad-an og kita, ug mga trabahante nga nawad-an sa ilang trabaho. Taliabot pa ra ba ang eleksiyon nga posibleng "super-spreader" sab kay di kapugngan ang katawhan nga moduol sa ilang idolong kandidato sa panahon sa kampanya.

Mao kini ang dakong hagit sa atong kagamhanan ug Commission on Elections (Comelec) kung unsaon nga magpabiling luwas ang katawhan sa panahon sa eleksiyon.

Hinuon, sa akong nahibal-an, taas na ang ihap sa nagpabakuna busa moabot na tingali kining gitawag nila nga "herd immunity" nga di na matakdan ang wa nagpabakuna.

Busa, amping-amping lang ug unta malinawon ang atong nasud luyo sa giyera sa Ukraine karon.