DIHANG gidawat ni Senador Manny Pacquiao ang nominasyon kaniya sa Partido Demokrtiko Pilipino-Lakas ng Bayan (PDP-Laban) nga mahimong standard bearer sa pagka-presidente karong Mayo 2022 nga eleksiyon, misaka ang kilay sa akong mga higalang professionals niadtong Lunes sa buntag.
Suma pa nila nga ambisyoso ra kaayo si Pacquiao nga mangandoy nga mahimong pangulo sa nasud bisan wa siyay ikasarang kung kinaadman ang hisgutan.
Sa among hisgut-hisgot, suma pa nila, unsa daw ang katakus ni Pacquiao kung makig-atubang na sa mga dagkong lider sa kalibutan? Kay lagi di man maayo ang pundasyon sa edukasyon ni Pacquiao.
Ako sab silang gitubag (dalang ngisi) nga wala man nagmando ang Batakang Balaod (1987 Philippine Constitution) nga kinahanglan abogado o doktor ang mahimong mokandidato sa pagka-pangulo.
Sulti pa nako, ang Article 7, Section 2 sa Konstitusyon nagkanayon lang: "No person may be elected President unless he is a natural-born citizen of the Philippines, a registered voter, able to read and write, at least forty years of age on the day of the election, and a resident of the Philippines for at least ten years immediately preceding such election."
Dalang ngisi ngadto nila, akong gipahimug-atanan ang giingon sa Konstitusyon nga "makabasa lang ug makasuwat ang kandidato sa pagka-pangulo, payts na." Ug didto mikaransa sila kay, alang nila, di gyud maayo nga mangarisgar si Pacquiao sa pagdumala sa nasud.
Ning puntoha, ako na silang giingnan nga mao gani nga dunay kampanya ug eleksiyon aron mahimbisan ang mga kandidato sa bisan unsang posisyon sa gobyerno.
Kung sa tan-aw ninyo nga di siya angayan sa maong posisyon, aw, di ninyo siya iboto kay inyo man kanang katungod ang pagboto ilawom sa (Right of Suffrage) sa Konstitusyon.
Sa akong kabahin, isip magsisibya sa radyo ug manunulat sa mantalaan, naningkamot ako nga mahimong non-partisan sa tanang panahon.
Buot ipasabot nako nga di nako gamiton ang pasilidad sa kompaniya nga akong gialagaran aron dauton ang usa ka kandidato. Hinuon, motabang ako sa pag-edukar sa mga botante kung unsa ang mga hiyas sa lider nga angay natong saligan sa renda sa gobyerno.
Di ako magbuot kanila kung kinsa ang iboto tungod kay ang akong responsibilidad lamang mao ang pagbalita sa mga plata porma de gobyerno ug ang mga nahimo nga kontribusyon sa matag politiko.
Kini unya ang himuon nga basehan sa mga botante kung kinsa ang angay nilang iboto.
Balik kita kang Pacquiao, wala kanako ang katungod nga mohukom pabor o dili sa akong mga higala nga misaka ang kilay sa nominasyon sa Pambansang Kamao.