COTABATO CITY -- Diriyot nga mapusgay ang "for adults only" sa suspek nga nagpayuhot og druga human gipusil ug naigo sa sampot sa dihang nangilog og armas sa mga pulis alas 2:00 sa hapon, Lunes, Pebrero 28, 2022.
Ang suspek na naigo sa lubot mao si Mahid Ulah, 37, minyo ug molupyo sa Sultan Mastura, Maguindanao Province.
Sumala ni Maguindanao Police Provincial Office Director Colonel Jibin Bongcayao nga gidakop sa mga pulis ang suspek sa iyang gitaguan sa Sultan Kudarat.
Atol nga posasan na unta si Ulah, kalit kining nangilog og pusil sa usa ka pulis, hinungdan nga gipikhan siya sa kaubang pulis.
Naigo sa lubot ang suspek nga milapos pa duol sa iyang kinatawo.
Narekober sa posisyon sa drug pusher ang lima ka dagkong pakite sa shabu ug drug paraphernalias.
Gidala si Ulah sa mga pulis ngadto sa Cotabato Regional and Medical Center sa Cotabato City ug giingong nagpaalim pa sa naangkong samad apn gihugtan pagbantay sa mga pulis.
Nasayran nga dunay warrant of arrest ang suspek nga giisyu ni Acting Presiding Judge Kasan K. Abdulrakman sa 12th Judicial Region, Regional Trial Court, Branch 14, Cotabato City sa kaso nga kalapasan sa section 12, article 2 sa Republic Act 9165 o Comprehensive Dangerous Drug Act of 2002.