Kyiv, Ukraine - Ang pagpamomba sa Russia niigo sa mga sibilyan nga target sa ikaduhang kinadak-ang siyudad sa Ukraine sa Martes, Marso 1 samtang 40-milya o 64 kilometro nga gitas-on sa linya sa mga tangke ug uban pang mga sakyanan mihulga sa kaulohan.
Taktika kini nga giingong gitumong nga magpugos sa presidente sa Ukraine, Volodymyr Zelenskyy, nga molunga ug mohatag sa unsay gusto sa Moscow sa labing dakong gubat karon sa Europe sa nanglabay nga mga henerasyon.
Karon nga nahimuwag na ang Kremlin pinaagi sa bug-at nga ekonomikanhong mga silot nga nakaguba sa kwartang ruble, ang mga sundawong Russian misulay sa pag-asdang sa duha ka labing dakong mga siyudad sa Ukraine.
Sa estratehikong Kharkiv, dakbayan nga adunay populasyon nga mga 1.5 milyon, ang mga video nga gi-post sa online nagpakita sa mga pagbuto nga miigo sa administratibong mga building sa panahon pa sa Sobyet ug mga lugar nga puy-anan sa mga sibilyan.
Sa tibuok nasud, daghang mga sibilyan nga Ukrainian ang nagpalabay og gabii nga nagpunsisok sa mga pinuy-anan, basement ug mga suok.
Nanaghan usab ang mga nangamatay ug nangaangol samtang ang Ukraine nag-atubang sa ikaunom nga adlaw sa pagsulong sa Russia. (AP)