NALIMBUWAD ang Isuzu D-MAX human nidaro sa punoan sa lubi ug poste sa kuryente nga niresulta sa pagkamatay sa pasahero niini.
Ang vehicular accident nahitabo sa Barangay Tamiao, Bantayan, mga isla sa Bantayan, amihanang Sugbo, niadtong Lunes, Pebrero 28 sa gabii.
Nasuta nga ang Sangguniang Kabataan (SK) Federation president sa lungsod sa Sta. Fe, nga si Jessie Ladeth Batiancila Contento, 27, maoy nagmaneho sa sakyanan atol sa aksidente.
Samtang sakay ni Contento si Gildo Espinosa, 28, ulitawo, taga Barangay Pooc, Sta. Fe.
Si Police Major Wendell Abellana, hepe sa Bantayan Police Station nga nahinabi sa Superbalita Cebu, nagkanayon nga sila si Contento ug Espinosa gikan sa lungsod sa Madridejos.
Sigun sa mga nakasaksi nga kusog ang pagpadagan sa sakyanan ni Contento.
Base sa imbestigasyon nga nga wa na makontrolar sa drayber ang manubela ug milahos ngadto sa punoan sa lubi ingon man sa tupad nga poste hinungdan nga nahayang ang sakyanan nga mitugpa sa nataran sa usa ka balay, daplin sa kalsada.
Mga sakop sa Municipal Disaster Risk Reduction and Management personnel maoy ningtabang sa mga biktima ug dali nga ningdala kanila sa Bantayan District Hospital.
Wa na matabang sa mga mananambal si Espinosa kinsa nakabsan sa kinabuhi gumikan sa grabeng kadaot sa iyang dughan ug apapangig.
Samtang si Contento gibalhin og tambalanan sa Dakbayan sa Sugbo kay giingong grabe ang kahimtang.
Si Abellana niingon nga adunay gitambungan nga kalihokan ang mga biktima ug giingong hubog.
“Pwerti kusoga gyud kay nabulintang, gidaro pa ang punoan sa lubi ug poste. Nagusbat ang sakyanan,” paghulagway ni Abellana.