KAKUNSABO sa usa ka drug lord nga naa sa sulod sa Cebu City Jail nadakpan sa anti-illegal drug operations sa Regional Police Drug Enforcement Unit (RPDEU) 7 sa dan F. Pacaña, Barangay Tisa, siyudad sa Sugbo, pasado alas 7:00 sa gabii sa Martes, Marso 1.
Si Police Captain Joffre Grande, team leader sa RPDEU 7, maoy nangulo sa anti illegal drug operation kuyog ang iyang mga sakop nga niresulta sa pagkasikop ni Mario Alterado Tabanas, Jr., alyas ‘Mar’, 32 , lumolupyo sa dan F. Pacaña sa nahisgutang barangay.
Sa operasyon, nasakmit gikan kang Tabanas ang shabu nga motimbang og 211 gramos nga dunay street drug price nga P1.4 milyunes.
Si Police Lieutenant Colonel Ronnie Failoga, pangulo sa RPDEU 7, nibutyag nga ang ilang dinakpan makonsiderar nga regional high value individual tungod sa gidaghanon sa nasakmit nga shabu.
“Actually ang area niyan boong Cebu City. Meron ding Talisay at Mandaue City. Doon lang siya nagbibigay sa mga kakilala niya sa Talisay at Mandaue,” matod ni Failoga.
Dugang ni Failoga nga si Tabanas gi-monitor sa iyang mga sakop dul-an duha ka semana hangtod nga gilusad ang buy-bust.
Si Tabanas, sa iyang pamahayag, niingon nga wala siya kaila sa iyang agawon apan ang ig-agaw niini nga si Alan Caburnay nga anaa sa sulod sa bilanggoan maoy nikontak kaniya hangtud nga siya gitagaan og drugas apan wala siya kaila sa tighatod niini.
Kaso nga kalapasan sa Republic Act 9165 kun Dangerous Drugs Act of 2002 giandam batok sa suspek. (BBT)