LAWAS nga napalgan sa tangkungan sa dalan Vestil, Barangay Mambaling, siyudad sa Sugbo sa alas 5:30 sa hapon sa Dominggo, Pebrero 27, gikuha na sa iyang igsuon.
Si Febes Evita Osabel, manghud, maoy niila sa biktima nga si Rofino Villagonzalo, 39, lumolupyo sa Sityo Lomboy, Mambaling, Dakbayan sa Sugbo.
Matod ni Osabel nga nahinabi sa Superbalita Cebu, nahibawo sila nianang Lunes na sa buntag, Pebrero 28, human nga ang kapuyo niini nga si Baby Chona Maglasang nitawag kanila.
“Naa naman gud ko sa Medellin nagpuyo, Sir. Unya kami naman lang duha mao to nga akong gianhian uban sa akong papa kay walay moasikaso,” matod Osabel.
“Siguro, Sir, naalaan pero dili man na asset akong maguwang. Mahadlok gani na og pulis,” dugang ni Osabel.
Matod sa igsuon, ang iyang maguwang usa ka mekaniko ug napriso sulod sa upat ka tuig human gikiha sa tag-iya sa iyang giayo nga motorsiklo.
Samtang ang kapuyo ni Villagonzalo nga si Maglasang nibutyag nga alas 2:00 niadtong Dominggo, Pebrero, 27, usa ka nagngalan og ‘Samuel’ nga kaila sa iyang kapuyo maoy nikuha kang Rofino.
Si Samuel gusto nga magpatabang sa paghakot og kahoy.
Apan niabot na lang og gabii hangtod sa kaadlawon sa Lunes, nagsige og paabot si Maglasang sa iyang kapuyo.
“Dunay nakasulti nga adto sa Presinto 11 kay naay napalgan nga patay. Mao to gipaadto mi sa St.Francis kay tua ang patay, ug siya gyud, Sir, akong bana gyud,” matod ni Maglasang.
Hangyo ni Maglasang nga unta mopatim-aw si Samuel kay siya ang katapusang kuyog sa iyang kapuyo sa wala pa kini namatay.