PATAY ang tres anyos nga batang lalake ug angol ang iyang inahan human nabanggaan ug nalatayan sa Prime Mover sa Cebu South Coastal Road (CSCR) sa dakbayan sa Talisay, pasado alas 12:00 sa udto kagahapon, Marso 2.
Si Jonathan Tumulak, pangulo sa City of Talisay Traffic Operations and Development Authority (CT-TODA), niila sa drayber sa trak nga si Feliciano Villanueva, Jr.
Si Tumulak niila sab sa biktima nga si Zion Olivo.
Sa pasiunang imbestigasyon ni Tumulak, ang drayber wala makakita nga diha sa kilid ang motorsiklo nga gisakyan sa bata ug inahan nga gimaneho sa amiga sa naulahi.
“Matod pa sa drayber sa truck nga niadtong higayona, diha siya sa intersection kay stop signal. Wala siya kabantay nga adunay motor nga naa sa iyang kilid, dapit sa may driver side,” asoy ni Tumulak sa Superbalita Cebu.
Dihang go signal na, niabante ang trak ug diha na nakabantay ang drayber human dunay nipaka sa kilid.
“So, nikalit siya paghunong ug paghunong didto na niya nadiskubrehan nga aduna siya’y nadasmagan ug naligsan. Kining bata, matod pa sa mga saksi, gikugos ni sa iyang mama,” dugang ni Tumulak.
Nailhan ang inahan sa bata nga si Roxanne Balansag, 25, taga dakbayan sa Lapu-Lapu, kinsa angol sa aksidente.
Ang nagmaneho sa motorsiklo mao si Rebecca Alcontin nga kaila sa inahan sa bata.
“Kana maoy ato pang subayonon og ma-interview na ang drayber sa motorsiklo og unsang panghitaboa nga diha man siya kilid sa truck de karga. Subayon pa ni sa imbestigasyon sa atong kapulisan,” matod ni Tumulak atol sa pagkutlo ning taho.
Atol ning pagsuwat, ang kapulisan wala pa masayod sa lakang sa pamilya sa bata sanglit nagpadayon pa ang imbestigasyon.
Si Tumulak nipahihumdom sa mga motorista nga magmabinantayon diha sa kadalanan aron malikayan ang susamang insidente.
“Ato lang pahinumdoman ang atong mga drayber nga aduna may national law nga gibawal ang pagsakay sa mga bata sa motorsiklo ilabi na gyud og dili makaabot sa motorsiklo. Mao na nga ato na silang pahinumdoman nga aduna tay balaod niana. Usa na siya sa kampanya nga gihingusgan sa LTO (Land Transportation Office),” pahimangno ni Tumulak.