KRITIKAL ang asawa human gidunggab sa bana og 14 ka higayon atubangan sa ilang tulo ka mga gagmayng anak sulod sa ilang panimalay sa Barangay Manduyong, lungsod sa Badian niadtong Miyerkules, Marso 2, alas 7:00 sa gabii, tungod sa tumang pangabubho.
Tinuod nga mga ngan sa magtiayon gipugngan ning mantalaan.
Nakaangkon og samad sa nagkalainlaing parte sa lawas mao si Jen (di tinuod nga ngan), 27, tindera sa usa ka tindahan sa Carbon Public Market sa dakbayan sa Sugbo.
Si Jen gidali pagdala sa iyang mga kabanay sa usa ka ospital sa dakbayan sa Sugbo.
Ang suspek nga si Romeo (di tinuod nga ngan), 30, mamumuo, nadakpan atol sa hot pursuit operation sa kapulisan sa Badian, alas 11:00 sa gabii sa Miyerkules.
Si Police Corporal Norman Aparre, imbestigador sa Badian Police Station, nagkanayon nga si Jen kritikal nga gidala sa tambalanan sa Badian, apan gibalhin sa ospital sa Siyudad sa Sugbo tungod sa grabeng samad nga naangkon.
Dugang ni Aparre, ang bana, matod pa, gisanapan sa tumang pangabubho human giingong nakabasa sa selpon sa asawa nga dunay laing lalaki nga gika-chat.
Tungod niini, dason sa kapulisan, naghubog si Romeo ug pagkagabii, nakigkomprontasi kang Jen nga nisangko sa ilang panaglalis.
Sa kalagot ni Romeo, nikuha siya og kitchen knife ug gidunggab sa makadaghang higayon ang iyang asawa atubangan sa ilang tulo ka gagmay nga mga anak.
Dihang gikahinabi sa kapulisan, si Romeo niangkon sa krimen ug nipadayag nga ningitngit ang iyang panan-aw sa tumang pagselos sa asawa.
“Nasakpan niya, nakabasa siya sa selpon nga dunay lalaki nga ka chat (ang biktima). Magkita daw sila sa usa ka dapit sa dakbayan sa Sugbo,” asoy ni Aparre nga nikutlo sa pamahayag sa bana.
Nasayran sa kapulisan nga si Jen panagsa ra mouli sa Badian tungod sa ka-busy sa trabaho isip tindera sa Carbon Public Market.
Si Romeo nibutyag nga taudtaod na siyang nakabantay sa lihok sa iyang asawa.
Gipadayag sa bana nga human siya nasakit og goiter, wala na siya manarbaho ug nagbantay na lang sa ilang mga bata.
Ang iyang asawa maoy nagtrabaho sa Carbon market sa dakbayan sa Sugbo.
Gipadayag sa bana nga “nagmata lang ko’g morning sa gihimo sa akong asawa,” apan nagduda siya nga nagluib kaniya hinungdan nga dihang nipauli, naghuboghubog siya ug iyang gisukmatan.
Ang suspek nagmahay ug niingon nga nawala siya sa kaugalingon gumikan sa tumang kalagot sa pangatarungan sa iyang asawa.
Ang kapulisan sa Badian nangandam sa pagpasaka og kasong frustrated parricide batok kang Romeo.