AMAHAN patay ug ang anak angol human nabanggaan ang ilang motorsiklo sa trak sa national highway sa Barangay Casay, lungsod sa Dalaguete, alas 6:30 sa gabii sa Miyerkules, Marso 2.
Namatay diha-diha si Marcelino Camelo Caruzca, 38, minyo, taga Barangay Tuba, Dalaguete. Samtang angol ang iyang anak nga si John Kenneth Caruzca, 15, tinun-an sa grade 10 o senior high.
Si Major Gilfred Baroman, hepe sa Dalaguete Police Station, nagkanayon nga si Marcelino maoy nagmaniho.
Dugang ni Baroman, ang Honda XRM nga gimaniho ni Marcelino nigawas sa eskina sa highway, apan ang Isuzu Elf naghaguros ug wala na madala og prino sa kaduol sa motorsiko ug nabanggaan kini.
Ang drayber sa trak nga si Jhamid Taulla Habi, hingkod, taga lungsod sa Maluso, Basilan, gikan sa Mindanao ug niagi sa pantalan sa lungsod sa Santander ug nagdali padung sa dakbayan sa Mandaue aron paghatod sa mga kugita.