NIKABAT sa 346 ang ninggraduwar sa fire basic recruit course nga gipasiugdahan sa National Fire Training Institute (NFTI) nga gihimo sa Cebu Technological University (CTU) Danao City campus kagahapon, Marso 4.
Ang mga graduwado gihatagan og ranggo nga Fire Officer (FO) 1 ug ang naasoy nga kurso o pagbansay usa sa mga rekisito aron mosaka ang ranggo sa usa ka bombero.
Usa sa dinapit nga bisita sa graduwasyon mao si FCSupt. Belinda Ochave, direktor sa NFTI, nga labing unang heneral nga babaye sa Bureau of Fire Protection (BFP).
Sa eksklusibong pakighinabi sa Superbalita Cebu kang Ochave, siya niingon nga ang pagbansay sa CTU Danao kabahin sa ilang gipatuman nga satellite campus sa BFP nga magtanyag sa kurso nga alang sa tanang mga bombero aron mas duol bus dili dako og gasto ang mga mokuha sa kurso.
Dugang ni Ochave nga sa naandan, ang pagbansay adto pagahimuon sa Camp Vicente sa Calamba, Laguna sa national headquarters sa BFP.
“Kaya nagkakaroon kami nang satellite campus dito sa Region 7, dito sa CTU Danao, meron din kami sa Tacurong City sa Region 12 at Kawa-Kawa sa Ligao, Albay sa Region 5,” matod ni Ochave.
Ang mga ninggraduwar nga bombero gikan sa Rehiyon 6,7 ug 8.
SUNOG SA CEBU CITY
Siyam ang natala nga namatay sa sunog sa 2021 subay sa listahan sa Cebu City Fire Office samtang way namatay sa 2019 ug 2020.
Si SFO2 Wendell Villanueva, tigpamaba sa CCFO, niingon nga sa ilang tally sa mga nangamatay sa sunog, ang 2021 ang taas.
Sa Marso 2021, usa ang namatay sa sunog sa Sityo Laguna, Barangay Bulacao. Usa ka 28 anyos nga babaye nga dunay problema sa pangisip ang napaig.
Sa Agusto 2021, pito ka mga tawo ang nakalas sa sunog sa Barangay Santa Cruz.
Niadtong Disyembre 2021, usa ang namatay sa sunog sa Barangay Tisa.
Sa samang listahan sa CCFO, 457 ka mga sunog ang niigo sa Cebu City sa 2019, diin sa Abril ang labing taas kay niabot og 73. Minos lang og tulo ka sunog ang Marso, gisaulog nga Fire Prevention Month, kay niabot og 70. Nidanyos ang mga sunog sa 2019 og P16.8 milyunes.
Sa 2020 nga maoy pag-igo sa pandemya, nitibugsok og maayo ang gidaghanon sa sunog kay 192 ra ang natala. Hinuon mas dako og danyos kay niabot og P40.5 milyunes.
Nisaka og gamay sa 2021 ang gidaghanon sa mga sunog human nitala ang CCFO og 203, apan hapit pil-a og katulo ang danyos nga niabot og P100.6 milyunes itandi sa 2020.
Una nang gibutyag sa tigpamaba sa Cebu City Fire Office SFO 2 Wendell Villanueva nga ning tuiga, ang ilang target nga mokunhod ang insidente sa sunog ug nanawagan siya sa pag-abag sa publiko.