Nahinumdom ba mo niadtong kontrobersiya sa boxing sa Bogo City, Cebu niadtong Pebrero 5, diin wa tugoti ni Dr. Jose Unabia nga makaaway si Christian Pitt Laurente batok ni Vicente Casido sa main event fight sa GerryPens Promotions?
Sigon sa atong kasaligan nga tinubdan, nga posibling di na kuhaon sa Games and Amusement Board (GAB) nga boxing ring physician si Unabia human masuta nga wa diay deperensiya sa panglawas si Laurente ug fit-to-fight unta diay kini.
Si Unabia, bisan pa og gitawagan na kini sa chairman sa GAB nga si Baham Mitra ug ingon man ang chief ring physician sa Kaulohan nga ipadayon ang away kay aduna na kini go signal gikan sa ilang buhatan, wa mopatuo ug nihudlat pa kini nga mo-walkout.
Iyang rason nga aduna siyay nakitang gidudahan nga deperensiya sa kasingkasing ni Laurente hinungdan nga di siya makatugot nga makaaway kini.
Pero nasuta nga cleared diay ang boksidor nga makaaway. For the record, si Unabia dili cardiologist.
Ang promoter nga si kanhi world boxing champion Gerry Penalosa nibutyag nga ang tanang proseso ug requirements alang sa maong boxing promotion ilang natuman ug nasunod bisan tuod og dako-dako na sila og gasto niini, ilabi na kay katulo na ka higayon kini nga nauswag.
Apan nisamot og kaguba ang ilang promotion human nga niana nang adlawa gipakanselar sa doctor ang main event fight nga nakapasagmuyo usab sa ilang mga sponsors.
Matod pa sa atong tinubdan, nga aduna nay duha ka bag-ong doctor karon nga gi-accredit ang GAB. Hinuon wa pay pormal nga notisya kon tangtangon ba sa GAB ang accreditation ni Unabia.
Saludo ko ni GAB chairman Mitra. Moaksiyon gyud og mga yangongo. Bilib ko sa iyang liderato.
Pero maayo sab siguro nga imbestigahon sa GAB kon nganong wa motunga ang OIC GAB Region 7 Director niadtong maong promotion ug nganong sagad sa mga mi-officiate sa nahisgutang promotions dili man taga Region 7?
Unsa ka tinuod nga ang promoter nay nanawag og mga boxing officials gikan sa laing rehiyon aron maoy mo-officiate kay daw og sa way suporta ang OIC sa Region 7?
Nganong wa man siya mopadala og iyang kaugalingong staff nga gikan sa Region 7 nga mao unta ang mo supervised in his behalf?
Unsa sab ka tinuod nga dunay kasikas ug kaguliyang karon tali sa pipila ka mga accredited boxing officials ug niining bag-ong natudlo nga GAB-OIC sa Region 7? Just asking.
******
Ari ta sa laing isyu. Hangtod karon wa pa gihapon mahatagi og kasulbaran kining panagbangi tali ni Filipino Olympian pole vaulter Ernest John “EJ” Obiena ug sa Philippine Track and Field Association (Patafa) nga gipangulohan ni Philip Ella Juico.
Nagtuo ta nga mahapsay na ang kaguliyang sa ilang relasyon sa dihang ni- intervene na ang Senado pero mora og wa pa man diay matagbaw ang Patafa ug daw sa nagpangagot kini nga nilusad og opensiba ngadto ni Obiena.
Niadtong Pebrero 24, nagpadala si Obiena og suwat ngadto sa Patafa nga nangayo sa ilang endorsement nga maka represent sa nasod sa umaabot nga World Indoor Athletics Championships (WIAC), Southeast Asian Games (SEAG), World Athletics Championships (WAC) ug sa Asian Games (AG) karong tuiga.
Pero ang tubag sa Patafa nagkanayon nga ila lang kining buhaton kon mahuman na ang mediation process nga himuon sa Philippine Sports Commission aron mahusay na ang maong isyu tali sa Olympian ug sa ilang federation.
Ning bahina, mora og ang world no. 5 pole vaulter nga si Obiena maoy naipit tungod kay karon na mang Marso 18 ngadto sa 20 ipahigayon ang WIAC didto sa Belgrade, Serbia.