Tuig 1979 na ko nagsugod sa pagka aktibo kabahin og mga kalihokang pagduso sa katungod sa mga tinun-an.
Nagyaka ra mi sa akong barkada sa football field sa USC Talamban nga naghisgothisgot unsay kaayohan nga among mahimo.
Kalit nga niabot ang among maestra akong gikumbinser nga mahimo namong adviser sa among grupo.
Iyang gihatag kanamo ang usa ka notisya sa school administration kabahin sa tuition hike sa sunod tuig.
Naghisgot ang notisya kabahin og konsultasyon.
Sa akong nahibaw-an, walay mekanismo ang USC kaniadto kabahin sa konsultasyon.
Mao among namugna ang paghimog petisyon batok sa maong tuition hike ug sa panginahanglan sa pagbalik sa student government.
Tuod man, sud sa mga 1-2 ka semana, miabot og kapin sa 3,000 ka mga tinun-an ang namirma.
Naay niduol kanamo nga taga main building aron motabang.
Busa, sulod sa lain usa ka semana, niabot og 5,000-6,000 ka mga pirma ang among petisyon.
Wa namo mapahunong ang tuition hike. Apan nasugdan ang usa ka kalihokan alang sa pagbalik sa usa ka student government sa USC.
Sukad niadto, nagsugod na ko og kaamgo sa mga kahimtang sa katilingban. Mao to nga naaktibo ko sa mga kalihokang anti-Marcos.
Kini akong gisaysay sa usa ka online talk nga gipahigayon sa Casa Gorordo Museum.
Politikal?
Mahimuot ko sa pipila ka comments sa maong panaghisgot. Ngano kuno maghisgot og politika ang usa ka museum?
Naa lang gyuy mga tawo nga masuko kon maghisgot og mga isyu sa panahon sa diktadurya.
Di sila makadawat sa mga dautang panghitabo niadtong tungura sa atong kasaysayan.
Sala sa amahan
Matod pa, ngano kuno nga pakasad-on ang anak sa sala sa amahang diktador kaniadto.
Hmmm. Maayo unta og gamayng bata nga walay buot si Marcos Jr. dihang nahitabo ang diktadurya.
Pero mga 1981 usa na siya ka bise gobernador sa Ilocos. Wa nay buot?
Maayo sab unta kon wa modesisyon ang Korte Suprema nga ill-gotten ang ilang binilyon nga katigayonan kaniadtong 2003.
Dayon maayo unta kon wa gigamit ni Marcos Jr. ang maong kinawat nga katigayonan sa amahan.
Emosyonal
Ang ako lang kay lisod pasabton ang daghang mga tigpaluyo ni Marcos. Di na man gud motoo kon hisgutan og tinuod.
Lalim bay mas motoo pa sila nga kining katigayonan ni Marcos gikan pa sa Tallano gold?
Kining Tallano gold klaro na kaayong binuang. Pero motoo ang mga loyalist ni Marcos.
Kon mokuwestiyon ka sa ilang pagtuo, masuko dayon oi. Ang lehitimong media pa ang nag-fake news.
Sayon lang ingnon nga binayran ug gustong makabahin sa kinawat kini sila.
Pero daghan baya ang mga tarong. Nailad lang gyud. Ug lisod gyud angkunon nila nga nailad. (DM nako sa @anol_cebu)