Sa nagsige pa ko og biseklita ug hangtod nga nagsige na ko og motorsiklo, akong nabantayan nga way kausaban ang mga paninguha sa mga ahensya sa kagamhanan sa pagtudlo sa mga balaud sa trapiko. Daghan gihapon ang mo counterflow, mo beat sa red light ug kanang mag drive nga maorag maoy tag-iya sa karsada.
Naa say uban nga kon lawom nang gabii, grabe kahinay mopadagan sa sakyanan nga unta, nasayod sila nga duha ra ka lanes ang agianan, nga maora na hinuon og nagsunod og funeral ang lumbay sa nagsunod nga mga motorista.
Nakasuway na mi sa akong asawa nga nagsunod mi og mga sakyanan nga 26 kilometers per hour ang gikusgon sa among dagan sa pagpauli. Unsay diay gibuhat sa drayber nga nag-una? Naay kaestorya sa iyang cell phone. Nakakita mi kay amo na man lang giunhan.
Wa mag-inusara ang driver sa buhat nga ing ato kay kami sa akong asawa naandan na kaayo ni nga talan-awon o among encounter sa karsada. Maghilak ang adlaw nga di mi makakita og mga driver nga nagbuhat niini, apan gipasagdan lang sa traffic authorities.
Kini nga buhat kalapasan ni sa Republic Act 10913 kun Anti-Distracted Driving Act (ADDA). Nahinumdom pa ko nga grabe ang dinakpanay sa mga driver nga nagbuhat niini sa kadalanan, bisan dinhi sa Sugbo. Kon unsa ka sibot ug kapaspas nga nakapatuman sa mga traffic authority sa balaud, mao sab ni kadali nga napawong.
Ningas kugon kaayo nga naandang batasan sa mga Pinoy.
DISIPLINA
Nagpahigayon ang Land Transportation Office (LTO) og mga seminar sa mga drayber sa pampublikong mga sakyanan sa tinguha nga maedukar sila sa balaud sa trapiko ug safe driving.
Tingali dunay pipila nga nituhop ang seminar, apan kadaghanan balik ra gihapon sa ilang naandan nga buhat. Kanang mopadagan nga kaskasero. Way paghuna-huna sa kaluwasan niya ug ubang naa sa karsada.
Di man ko motuo nga kinabag-an sa drivers wa masayod sa balaud sa trapiko. Gawas sa seminar, tungod sa access karon sa internet, pila lang ka pindot sa keyboard o cell phone, imo dayong mabasa ang mga balaud sa trapiko ug safety tips.
Busa wa na kinahanglana unta ang seminar nga dako og kaon sa panahon sa yanong drivers. Ang pagdisiplina sa mga driver nga malapason sa balaud ang gikinahanglan.
Ang gibuhat unta sa LTO diha sa karsada di magbantay nianang nag modify sa ilang mga motorsiklo ug sakyanan. Moabag usab unta sila sa pagpatuman sa simple driving laws sa mga local government unit traffic enforcers, sama sa mga dakbayan sa Sugbo, Lapu-Lapu ug Mandaue. Mas kahadlukan ang LTO kay sa traffic enforcers nga mao lay manakop.
Tan-awa ra gud nang ubang drivers sa pampublikong mga sakyanan, nagbalikbalik ang ilang mga kalapasan sa balaud. Mao nang dunay mga higayon nga niabot nag tag P10,000 kapin ang ilang bayranan kay nagtipun-og na ang ilang multahan sa mga kalapasan.
Mas dako ang multa sa LTO kon maoy makasakop sa paglapas sa balaud sa trapiko. Kay kon silay makadakop, nasudnong multa ang ipahamtang, sama anang no entry nga P6,000 nga malabo ang usapon sa masakpan.
Bitaw, kon kaning one way streets ang bantayan sa mga traffic officer, haskang daghana sa masikop. Common kaayo ni sa may dan kilid sa KFC sa Redemptorist church ug karsada sa SOS Village sa Brgy. Talamban.
Mao ni ang bugtong paagi nga ang mga drayber sa kadalanan madisiplina. Way kapuslanan ang mga seminar kon di ipaak ang balaud sa kadalanan.