Kining akong lindog karong adlawa akong ipahinungod sa tanang babaye kay karong buwana ato mang gisa-ulog ang Women’s Month.
Akong ihulagway ang inadlaw-adlaw nga tulumanon namong mga babaye aron mahatagan og balor kon unsa ka bililhon ang pagka-inahan, asawa ug igsoon.
Segurado ko nga daghan ang maka-relate ini kay true-to-life man ning akong ibahin.
Sugod pa lang inig mata sa alas 4 sa kadlawaon, human mag-ampo, mura na kini og gikilatan kay magkara-kara naman og pangusina aron dunay ma-pamahaw ug balon ang tanan.
Human ma andaman ang pamahaw, magkig-bisog dayon kini og pangita og ma sakyan ma habal-habal, trisikad o jeepney para matigayon og hatod ang mga bata una molahos sa iyang trabahoan pasado alas 7 na sa buntag.
Human og kayod sa panginbuhian, mo dagan na sab kini og balik sa tunghaan para ma pick-up ang mga estudyante dayon uli na sa balay mga alas 5-6 na sa gabii.
Magkara-kara na sab og luto og panihapon , dayon manghugas sa gilutoan ug mga kubyertos unya mag-tutor na sab sa mga homework ug projects sa mga estudyante hangtod na ni alas 9 sa gabii.
Human manghinlo sa kaugalingon, check-apon na sab ang mga bata kon nahimutang na ba sa ilang higdaanan una mag-ampo. Unya kasagaran atimanon pa ang mga personal nga panginahanglan sa mga pares apil masahi o hilot maong makatulog kalagmitan pasado alas 11 o tungang gabii na.
Matulog og kadiyot ug minanok, dayon mo mata na sab para mag-andam sa sunod adlaw nga balik-balik nga tulumanon.
Kini tanan gisakripisyo sa atong kababayen-an labi na sa atong mga inahan apan subo palandungon kay wa man kini makita ug mahatagi og bili sa mga kabanay ug mga tawo nga iyang giatiman sa iyang palibot.
Makaguol sud-ungon ug palandungon kining sakit nga kamatu-oran nga wa makita sa katilingban ang mala-higanting tampo natong mga babaye.
Karong buwana angay natong pasalamatan ang tanang di-maihap nga kontribusyon sa atong kababayen-an.
Akong pagyukbo, respito og pahalipay. Happy Women’s Month!
(Kini nga lindog moguwa unta sa Sabado, Marso 5.