Helper sa usa ka dako nga farm sa lungsod sa Ubay nadakpan sa buy-bust sa mga pulis sa lungsod sa Ubay, Bohol.
Si Police Staff Sergeant Erico Daigan sa Ubay Police Station nibutyag sa Superbalita Cebu nga alas 7:20 sa Sabado sa buntag, Marso 5, ilang gihimo ang buy-bust sa Purok 2, Barangay Lomangog.
Matod ni Daigan nga ang ilang hepe nga si Police Major Rey Olar maoy nangu sa buy-bust nga nisangko sa pagkasikop ni Marlou Amolat, 21, taga Purok 1 sa maong barangay.
Upat ka pakete sa gidudahang shabu ang nasakmit gikan kang Amolat, kinsa kasamtangan nang gitanggong sa selda sa police station.
Kaso nga kalapasan sa RA 9165 kun Comprehensive Dangerous Drugs Act of 2002 ang ipasaka batok kang Amolat.