Apohan nga lalake gidakop sa kapulisan human malutsi og warrant of arrest sa duha ka mga kasong rape tungod sa giingong paglugos sa iyang 18 anyos nga apo nga dalaga sa miaging tuig.
Ang Anti Kidnapping Group-Visayas Field Unit (AKG-VFU) uban sa kapulisan sa Sogod, Cebu pinangulohan sa ilang hepe nga si Police Lieutenant Phil Restauro, nisikop kang Pedro (di tinuod niyang ngan), 64, sa alas 5 sa Biyernes sa hapon, Marso 4, sa iyang pinuy-anan sa Brgy. Poblacion, Sogod, Cebu.
Ang pagsikop kang Pedro gipasikad sa warrant of arrest nga giluwatan ni Judge Flor Amor Opon sa Regional Trial Court (RTC) Branch 25 sa Dakbayan sa Danao nga gipetsahan og Marso 3, 2022.
Matod ni Police Lieutenant Zosimo C. Ravanes Jr., team leader sa AKG, nga si Pedro, panday, giakusahang nilugos makaduha sa iyang babayeng apo niadtong Septiyembre 2021. Ang biktima anak sa babayeng anak ni Pedro.
Si Ravanes niingon nga si Pedro nanghimakak nga iyang gi rape ang iyang apo.
Nipasangil si Pedro nga gibutangbutangan siya og sala tungod kay istrikto siya sa iyang apo, labina sa paglaag kuyog ang mga barkada nga lalake.
Matod ni Ravanes nga tungod sa pandemic, nitipon si Pedro sa pagpuyo sa iyang anak nga babaye kay nawad-an siya og trabaho.
Atol sa pagdakop, giklaro ni Ravanes nga ilang gisunod ang gimando sa Korte Suprema sa pagkuhag video sa pagdakop pinaagi sa paggamit og cell phone kay wa pa silay body camera nga magamit.
Si Pedro kasamtangang gitanggong sa Sogod Police Station alang sa pagpresentar unya sa akusado sa korte.