Trese ka gikatahapang mga durugista nasikop sa tulo ka managlahi nga mga buy-bust nga gilusad sa mga sakop sa Philippine Drug Enforcement Agency (PDEA) 7 sa Biyernes, Marso 4,2022.
Tulo usab ka mga drug den gipangbungkag atol sa tulo ka mga buy-bust.
Una nga anti illegal drug operation gihimo alas 3:49 sa Biyernes sa hapon sa Purok 5, Barangay Ubojan, dakbayan sa Tagbilaran, kuyog ang PDEA Bohol Provincial Field Unit, apil ang Bohol Provincial Police Drug Enforcement Unit (BPPDEU) ug Tagbilaran City Police Station.
Ang mga nadakpan nailhan nga sila si John Llyod Ao, 20, giingong nagmintinar sa drug den ug giingong mga “parok” nga sila si Michael Iyana, 23; Rizmin Mejia, 21, ug Joerex Brix Alisbo, 20, pulos taga Tagbilaran City.
Moabot sa P88,000 nga balor sa shabu ang nasakmit base sa street value.
Samtang sa Dakbayan sa Sugbo, usa usab ka buy-bust gipahigayon sa laing team sa PDEA 7, nga gilusad sa Barangay Sawang Calero, Siyudad sa Sugbo.
Unom ka mga tawo nga giingong nalambigit sa drugas nadakpan nga mao sila si Rico Enolpe, 43, tighimo og tarpaulin, kinsa nagpaabang og gamay nga kwarto sa manggamitay ingon man sila si Michelle Kintanar,37; Jasmine Gaballo, 38; Joselito Canonio; 27, Christoper Ocaba, 38; ug Jezrel Reponte, 38.
Sa laing hugna sa operation sa alas 9:20 sa Biyernes sa gabii sa Sityo Brookside Valley, Barangay Lahug, ning Siyudad, laing tulo usab ang napusasan.
Si Reynaldo Pantojan, 38, kinsa nag pailang asset sa usa sa mga unit, wala mosaler. Si Pantojan giingong maoy namaligya sa suok nga payag sa nahisgutang lugar.
Lakip nga naposasan ang usa ka Ryan Jaravelo, 33, tigtimpla og juice ug Steven Alvarez, 28.
Moabot usab sa P136,000 nga balor sa drugas ang nasakmit sa duha ka mga buy-bust.
Ang tigpamaba sa PDEA 7, Liea Alcantara, nibutyag nga ang tulo ka buy-busts nalusad human sa usa ka semana nga pagpaniid sa ilang mga operating team.